Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D halo abertura ba II Jornada Edukasaun Físika no Desportu ho tema “Conbtributos Para Uma Vida Saudavel e Uma Cidadania Ativa” ne’ebé organiza husi Departamentu Edukasaun Fisika no Desportu (DEFD), iha Auditório Fundasaun Oriente, Dili, (29/04).
Iha diskursu, Reitór hato’o parabéns ba Departamentu Edukasaun Fisika no Desportu ne’ebé maka organiza II jornada sientífika ne’e tanba Desportu no Edukasaun Fisika ne’e importante tebes hodi hetan vida saudável, no desportu importante iha vida humana.
“Ita espera katak ho profesór internasionais sira-nia tulun bele fasilita diak liutan Departamentu Edukasaun Físika no Desportu ba oin no husu mós ba departamentu atu halo kampaña no promove desportu hodi atrai estudante sira tama iha departamentu ne’e. Husu atu deskobre desportu tradisional sira ne’ebé ezisti iha komunidade”, dehan Magnífiku Reitór.
Iha fatin hanesan Diretór DEFD Profesór Francisco Barbosa Pereira hatete, atividade II jornada sientífika ne’e hala’o durante loron rua hahú husi dia 29 to’o dia 30, ho objetivu atu transmiti koñesimentu ne’ebé profesór sira iha ba estudante sira.
“Husu ba estudnate sira atu aproveita didi’ak oportunidade ne’e hodi aprende saida maka oradór sira fahe. Nune’e ho atividade ne’e bele eleva kualidade estudante sira ninian la’ós teoria de’it maibé hatudu mós iha prátika”, dehan Profesór Francisco.
Partisipa iha II jornada sientífika ne’e Visereitor ba Asuntu Akadémiku no Garantia Kualidade Profesór Dr. Samuel Venâncio de Souza Freitas, reprezentante Ministériu Juventude no Desportu (MJDAC) nia Diretór Jeral Sr. João Rodrigues, Dekanu FEAH Profesór Teodoro Soares, Diretor SECA Profesór Vicente Paulino, diretór departamento, dosente no estudante sira.
Média UNTL 
: Mario Jonio M. Mendonça
: Mario Jonio M. MendonçaFoto 
: Domingos Amaral
: Domingos Amaral