Universidade Nacional Timor Lorosa’e (UNTL), nia Fakuldade de Turismo Artes Industria Criativas E Culturais (FTICC) realiza kongresu dahuluk ba antigu alunus ho tema “Liuhusi Unidade Alumni FTAICC, Ita Kompremete Atu Dezenvolve Turizmu Iha Timor-Leste”, iha Auditoriu FCE, INFORDEPE, Balide Díli (20/04).
Iha entrevista Prezidente Komisaun Instaladora Profesór Nuno David Gaio informa, husi kongresu ne’e atu instala asosiasaun alumni husi Fakuldade de Turismo Artes Industria Criativas E Culturais nune’e bele kria lasu amizade entre alumni ho fakuldade.
“Objetivu husi kongresu ne’e atu kria lasu amizade entre alumni sira ho fakuldade no oinsa alumni nia kontribuisaun ba iha fakuldade. Iha parte ida harii asosiasaun atu fasilita formasaun no kapasitasaun ba estudante sira kona-ba Turismu no asosiasaun mós sei fó kontribuisan ba fakuldade iha avaliasaun ANAAA nian ba iha kursu Departamentu Komersiu Turismu”, dehan Profesór Nuno.
Iha fatin hanesan Dekanu Faculdade de Turismo Artes Industria Criativas E Culturais Profesór Feliciano Quintas do Céu, agradese ba komisaun instaladora, tanba bele organiza alumni sira hodi partisipa iha kongresu ne’e.
“Nu’udar Dekanu sente orgullu, tanba imi kontinua hatudu imi-nia responsabilidade, étiku nu’udar alumni hodi eleva fakuldade nia naran liuhusi kongresu ida ne’e, ho objetivu ida ita atu fortalese eleva kapital sosial entre fakuldade ho alumni”, hatutan.
Dekanu salienta, liuhusi kongresu refere, fakuldade fiar katak kapasitasaun koñesimentu dezenvolvimentu edukasaun la’o nafatin nune’e mós liuhusi alumni no fakuldade kontinua promove alumni no estudante sira ne’ebé iha kapasidade di’ak fó oportunidade bolsu estudu.
Kongresu ne’e organiza husi alumni FTAICC no partisipa husi Xefe Departamentu Estudantís no Alumni Empregabilidade Sr. Elvino Alves Correia, Estrutura FTAICC, kongresista Alumni sira husi tinan 2008 no 2017 hamutuk haat nolu resin rua (42).
Média UNTL 
: Domingos Amaral
: Domingos AmaralFoto 
: Domingos Amaral
: Domingos Amaral