Universidade Nacional Timor-Lorosa’e (UNTL), nia Visereitór ba Asuntu Pós Graduasaun no Peskiza (VRAPGK) Profesór Dr. Afonso de Almeida, husu estudante foun sira atu proativu iha universidade liuhusi aprende iha aula laran no buka aprende barak husi atividade estrakurikulár inklui uza tempu livre hodi asesu ba biblioteka.
"Ha'u hakarak hato'o parabéns ba imi no husu ba imi nu’udar estudante foun tenke adapta ambiente universidade nian, liuliu aprende iha aula, partisipa atividade estra sira, nomós uza tempu livre asesu biblioteka, lee livru hodi hetan referénsia Monografia sira ne'ebé Imi-nia bin ho maun sira gradua ona tau hela iha biblioteka", dehan Visereitór iha Kampus Sentral, Díli (09/3).
Iha fatin hanesan, Thomas J. S. da Costa nu’udar estudante foun Faculdade de Direito hatete, semináriu ne'e importante tebes, tanba oradór konvense sira atu bele aprende no prepara an didi’ak.
"Ha'u kontente tebes ho semináriu ne'e, tanba ami bele aprende kona ba oinsa mak ami prepara ami nia an ho didiak inklui adapta an iha ambiente universidade nian, nune'e bele kompete iha área oioin iha nível nasionál no internasionál", dehan Thomas.
Prezidente Komisaun Organizadora FADIR nian Joanita Antonita Pinto hateten, total estudante foun hamutuk 125, no iha orientasaun ne'e senadu sira fahe esperiénsia ba estudante foun sira.
“Totál estudante foun FADIR nian hamutuk 125, no ohin ita halo orietansaun, liuhusi orientasaun ne’e bele orienta estudante foun iha área lideransa, nomós koko estudante sira oinsa mak atu bele ko’alia iha oin. Ami mós introduz ba sira kona-ba saida de’it mak eziste iha fakuldade nomós iha ambiente UNTL ninian”, tenik Joanita.
Média UNTL:
Antoneta X. C. Araújo
Antoneta X. C. AraújoFoto:
Eugenia de Jesus& Serginho da Costa
Eugenia de Jesus& Serginho da Costa