Universidade Nacional Timor Lorosa'e (UNTL) nia Amu Kapelaun, Pe. Nivio Correia Lebre Fdcc, liuhusi omilia husu ema hotu uza matenek mundu nian hodi halo buat ne'ebé loos no justu no buat ne'ebé santu, nune'e konsiente katak ema nu'udar karan ida ba ema seluk.
"Iha misa ida-ne'e ita husu Maromak atu haraik grasa matenek nia mai ita idaidak no husu ba estudante no ema hotu iha UNTL, atu uza matenek mundu nian ne'e hodi halo buat ne'ebé loos, justu no buat ne'ebé santu. Nune'e ita bele konsiente katak, ita nu'udar karan ida ba ita nia Maun-Alin sira", tenik Pe. Nivio iha misa agradesimentu hodi ensera orientasaun akadémika 2024 nian, iha Igreja Paroquia St. António Motael, Díli (9/03).
Iha fatin hanesan Magnífiku Reitór Profesór dr. João Soares Martins, MPH, Ph.D, agradese ba sivitas tomak, tanba hahú tinan foun ho misa agradesimentu, espera katak durante prekursu akadémiku, estudante foun sira bele uza didiak kna'ar ne'e ho responsabilidade.
"Agradese ba sivitas tomak, tanba hahú ano foun ho misa agradesimentu, espera durante prekursu akadémiku, estudante foun sira bele estuda ho di'ak to'o finaliza idaidak nia estudu ho rezultadu ne'ebé di'ak liu" dehan Reitór.
Misa agradesimentu ne’e organiza husi Proreitoria ba Asuntu Provedoria no Akonsellamentu (PRAPA) no prezide husi Padre Kapelaun, Pe. Nivio Correia Lebre Fdcc.
Partisipa husi visereitór, proreitór, diretór jerál, diretór nacional, dekanu, diretór departamentu, dosente, funsionáriu no estudante sira.
Média UNTL:
Leonia de A. da Costa
Leonia de A. da CostaFoto:
Ekipa Demkom
Ekipa Demkom