Universidade Nacional Timor Lorosa’e (UNTL) liuhusi Faculdade de Ciências Exatas (FCE) nia estudante hamutuk haatnulu resin rua (42) partisipa orientasaun akadémika tinan letivu 2024 ne’ebé ho tema “Formar Universitários Responsáveis, Produtivos, Inovativos, Conscientes e de Bom Caráter na Era de Digitalização’’ iha Auditóriu FCE nian, Balide-Díli (7/03).
Reprezentante Dekanu FCE nian no atuál Visedekanu ba Asuntu Administrasaun no Finansa Profesór Rosito Quintão, hato’o bemvindu ba estudante sira, tanba bele eskolla FCE hanesan fatin estudu hodi atinje mehi no hetan koñesimentu ba siénsia atu bele kontribui ba dezenvolvimentu nasionál.
“Ohin imi tur iha ne’e atu bele hatene, katak molok atu tama iha fakuldade ne’e difísil tebes, maibé agora imi sai hanesan estudante FCE nian. Imi hakarak atu bele hetan benefísiu tenki aproveita oportunidade ne’e hodi estuda makas nune’e termina husi ne’e imi bele valoriza siénsia ne’ebé imi hetan hodi implementa no kontribui ba dezenvolvimentu nasionál”, dehan Profesór Rosito.
Iha fatin hanesan, Proreitór ba Asuntu Dezenvolvimentu Institusional Profesór Lelis Gonzaga Fraga hato’o parabéns ba estudante sira, tanba bele konsegue tama iha UNTL no husu atu bele estuda makas hetan susesu.
‘’Parabéns ba imi, tanba bele tama ona iha UNTL no ba oin imi sei hasoru dezafius barak ho nune’e hau husu ba imi atu bele estuda makas hodi bele atinje ba imi nia objetivu iha fakuldade ida-ne’e”, dehan.
Atividade orientasaun akadémika ne’e organiza husi Senadu Estudantíl servisu hamutuk ho Komisaun Organizadora no partisipa husi dosente funsionáriu inklui estudante sira.
Média UNTL 
: Laurindo da Cruz Gomes
: Laurindo da Cruz GomesFoto 
: Teofilho Soares Tomas
: Teofilho Soares Tomas