Universidade Nacional Timor-Lorosa’e (UNTL) nia Magnífiku Reitór Profesór dr. João Soares Martins MPH, Ph.D, iha Kampus Resende, Díli (07/03), hateten, kursu Turizmu importante ba nasaun, tanba sai hanesan fonte reseita ne’ebé sustentável bele tulun ekonomia Timor-Leste nian iha futuru.
“Faculdade de Turismo Artes Industrias Criativas no Culturais (FTAICC) la’ós foku de’it ba Turismu, maibé ita mós sei iha prosesu estabelese tan kursu arte no indústria nian, tanba arte ho turismu ne’e nian ligasaun forte tebes tanba ita dezenvolve hodi atrai turista sira mai iha Timor-Leste. Bainhira setór Turizmu buras liutan bele kontribui reseitas ekonomia, nomós indústria ne’ebé iha ligasaun ho ita-nia kultura”, dehan Reitór iha ámbitu abertura orientasaun akadémika ba estudante foun FTAICC nian tinan akadémika 2024.
Reitór mós husu ba dekanu ho nia estrutura atu dezenvolve tan kursu foun foku no konsentradu para bele loke nafatin ramu iha arte no indústria nian.
Iha fatin hanesan dekanu FTAICC Profesór Feliciano Quintas hateten, Turizmu ne’e ramu ida ne’ebé importante hodi kontribui ba dezenvolvimentu ekonomia nasaun nian.
“Turismu ne’e hanesan mós lalenok no fó bem estar ba ema hotu, tanba ne’e mak ita hakarak hamriik mesak hodi sai fakuldade ida. Ita iha dosente permanente hamutuk na’in sia (9) nain haat (4) kontinua sira nia dotouramentu iha rai-li’ur. Dosente na’in lima (5) hamutuk ho profesór konvidadu sira hala’o hela sira-nia knaar hodi prodús rekursu kualifikadu hodi responde ba vizaun universidade nian”, dehan.
Iha abertura ne’e partipa husi Diretór Jerál Sr. Armindo Leto Fátima, Dekanu FEG Profesór Filipe X. Mendes, dosente sira husi FTAICC nian nomós estudante foun hamutuk 122.
Média UNTL 
: Domingos Amaral
: Domingos AmaralFoto 
: Domingos Amaral & Agostinho da Cruz
: Domingos Amaral & Agostinho da Cruz