Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH,Ph.D, asina Memorandu Entendimentu ho Ministru Ensino Superiór Ciência e Cultura (MESSC), S.E. José Honório da Costa Pereira Jerónimo, hodi estabelese sistema base de dadus ba ensinu superior iha Timor-Leste.
Iha salaun MESSC nian, Díli (4/03), Reitór hateten, universidade orgullu tanba, bele sai parseiru ho MESSC hodi implementa sistema baze de dadus iha ensinu superior, no orgullu ho Fakuldade Enjeñaria konsege presta servisu iha MESSC.
“Ita espera katak liuhusi sistema baze de dadus ne’e utíl ba ita hotu no ba oin ita bele submete dokumentu mai iha MESSC liuhusi sistema de dadus hodi dijitaliza sistema informasaun sira no agradese ba ministériu ba konfiansa, atu bele sai fornesedor ba sistema baze de dadus. Ne’e hanesan kontribuisaun UNTL nian ba nasaun Timor-Leste”, dehan Reitór.
Iha sorin seluk Ministro Ensino Superior Ciência e Cultura, S.E. José Honório da Costa Pereira Jerónimo, hateten asina nota entendimentu ho UNTL ne’e atu estebalese sistema baze de dadus ba ensinu superiór iha Timor-Leste.
“Estabelese baze de dadus ne’e importante atu ita bele asesu informasaun liuhusi website ministériu nian, nune’e bele hatene dadus kada instituisaun ensinu superior nian iha Timor-Leste, hodi bele identifika pesoal ne’ebé halo plájiu ka kopia traballu siéntifiku sira, nune’e MESSC nafatin servisu hamutuk ho UNTL atu ajuda ba iha sistema refere”, tenik Ministru.
Sistema baze de dadus ensinu superior ne’e sei fornese apoiu tékniku husi Fakuldade Enjeñaria Siénsia no Teknolojia, liuhusi Departamentu Enjeñaria Informátika hamutuk ho MESSC.
Partisipa iha asina memorandu ne'e, Proreitór ba Asuntu Kooperasaun Profesór Tomé Xavier Jerónimo, Proreitór ba Asuntu Informatizasaun Transformasaun Dijital no Inovasaun Profesór Frederico Soares Cabral, Diretora Jerál Ensinu Superiór no Siénsia, Maria Filomena Lay Guterres, Dekanu FECT Prof. Adalfredo G. da Silva Ximenes, Dosente no Funsionáriu sira.
Média UNTL 
: Mario Jonio Mendonça, Denilson A. Barros
: Mario Jonio Mendonça, Denilson A. BarrosFoto 
: Domingo Amaral
: Domingo Amaral