UNTL BA DAHULUK REALIZA ISAR-BANDEIRA IHA KAMPUS KAIKOLI

Universidade Nacional Timor Lorosa'e (UNTL) realiza ba dahuluk serimónia isar-bandeira iha Kampus Kaikoli, iha semana dahuluk fulan marsu 2024 nian, hodi hasa’e onra no valór ba eroi sira ne’ebé lakon no sakrifika ba Independénsia Timor-Leste nian.

Iha kampus FCS Kaikoli, Díli (4/03), liuhusi diskursu Magnífiku Reitór Profesór dr. João Soares Martins, MPH,Ph.D, konvida sívitas akadémika universidade nian hodi partisipa iha isar-bandeira ne’ebé hala’o iha inísiu kada fulan, hodi hasa’e onra no valór ba eroi sira ne’ebé lakon sira-nia vida no sakrifika ba Independénsia Timor-Leste nian.

“Isar-Bandeira ne’e ita hala’o kada fulan atu relembra nafatin valor hirak ne’ebé ita-nia eroi sira husik hela mai ita no valor ne’ebé sira rai hela mak kolaborasun ba malu hodi servisu ho responsabilidade atu tane nafatin ita-nia rai ba oin.Mai ita hotu hato’o parabéns no respeita ba vetenarus sira, tanba selebra ona loron nasionál iha 3 marsu, fó hanoin mai ita kona-ba sira-nia sakrifisiu no dedikasaun ba luta libertasaun pátria”, dehan Reitór.

Reitór mós kongratula dekanu foun FCS nian Prof. Dr. Alarico da Costa Ximenes ne’ebé foin simu pose, hodi kontinua nia knaar lidera fakuldade ba tinan haat 2024-2028.

Isár-Bandeira ba fulan Marsu nian, korpu isar-bandeira no koru responsável husi Faculdade de Ciências Sociais, no partisipa husi Visereitór, Proreitór, estrutura sira fakuldade nian, diretór jerál, diretór nasional, funsionáriu, dosente, no estudante sira.