Universidade Nacional Timor Lorosa’e (UNTL) nia Dekanu Faculdade de Economia e Gestão (FEG) Profesór Filipe X. Mendes halo abertura ba semináriu ho tema “Prontidaun Governu ba Implementasaun Padraun Kontabilidade Iha Timor-Leste” organiza husi Associação Estudantíl Departamento de Contabilidade nian, iha salaun Apuramentu CNE, Díli (28/2).
Profesór Mendes hateten, semináriu ida ne’e atu fornese informasaun no koñesimentu ba estudante sira oinsá atu uza estandar padraun kontabilidade iha Timor Leste.
“Ita hatene katak prespetiva padraun kontabilidade empreza ho governu nian la hanesan ho nune’e husu Governu atu estabelese padraun ida, hodi nune’e hafasil sosiedade sira hodi hatene klean konaba estandar padraun kontabilidade tamba padraun kontabilidade atu uniforma relatoriu ho fasil hodi kompriende”, hateten Dekanu FEG nian.
Esmeralda da Costa Martins, nu’udar estudante no partisipante hateten, semináriu ne’e bele hafanu estudante sira hodi hatene papel kontabilidade nian iha Timor-Leste liuhúsi setór privadu no setór publiku sira.
“Ha’u orgullu ho palestra ne’ebé aprezenta husi oradór sira, hodi fahe ona sira-nia koñesimentu kona-ba kontabilidade nian. Tanba liuhusi informasaun ida-ne’e bele hafanun ami estudante hodi kapasita no koñese papél kontabilidade nian, nune’e bele kontribui ba dezenvolvimentu nasaun nian”, tenik Esmeralda.
Partisipa husi estudante Faculdade de Economia e Gestão kompostu husi departamentu tolu mak Departamentu Jestaun, Kontabilidade no Siénsia Ekonomia.
Média UNTL 
: Eugenia de Jesus
: Eugenia de JesusFoto 
: Domingos Amaral
: Domingos Amaral