Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH,Ph.D, fó pose ba Dekanu foun na'in rua husi, Faculdade de Ciências Sociais (FCS), Profesór Dr, Alarico da Costa Ximenes no Dekanu Faculdade de Turismo Arte e Indústriais Criativas Culturais, (FTAICC) Profesór Feliciano Quintas do Céu, iha salaun FCE, INFORDEPE nian, Díli (29/02).
Iha diskursu Reitór deseza ba dekanu FCS no FTAICC, ne’ebé simu ona posse atu lidera fakuldade ho responsabilidade, dedikasaun no transparansia nune’e bele garante nafatin kualidade ensinu, peskiza no dedikasaun komunitária.
“Ha’u senti kontenti tanba ita bele hetan ona dekanu foun, husi FCS no FTAICC hodi lidera fakuldade, no agradese mós ba dekanu interinu Profesór José António no Dekana FTAICC, Profesora Glenda ba dezenpeñu servisu durante ne’e”, dehan Reitór.
Iha diskursu Ministru Ensinu Superior Siénsia no Kultura, S.E. José Honório da Costa Pereira Jerónimo, kongratula dekanu foun na’in rua asumi knar ho responsabilidade atu bele servisu ho di’ak hodi eleva kualidade iha departamentu sira.
“Parabéns ba dekanu nain rua, ha’u fiar ho grau akadémiku ne’ebé iha bele lidera fakuldade ho di’ak, presiza iha komunikasaun di’ak ba malu nune’e bele eleva kualidade servisu iha departamentu sira-nian hodi responde ba rekomendasaun ANAAA (Agência Nacional para Avaliação Académica) nian” dehan Ministru.
Iha sorin seluk Empozadu Dekanu FTAICC, Profesór Feliciano Quintas do Céu, agradese ba Magnífiku Reitór liuhusi konfiansa ba nia nu’udar dekanu definitivu ba FTAICC, no liuhusi oportunidade ne’e prontu atu aproveita no asumi knaar ho responsabilisa to’o mandatu remata.
"Agradese ba Reitór nia konfiansa, no ha’u kompromete atu hadia prosesu ensinu ba estudante sira to’o tinan haat ou lima bele finaliza estudu, nomós ami prontu ho responsabilidade hodi eleva fakuldade nia dezempeñu. Nune’e bele promove no hatur kualidade servisu atu melloria difikuldade ne’ebé durante iha prosesu ensinu", dehan Dekanu.
Mandatu ba dekanu nian hanesan define ona iha Estatutu Fakuldade nian ho durasaun tinan ha’at (2024-2028).
Partisipa iha pose ne'e, Ministru Ensinu Superior Siénsia no Kultura, S.E. José Honório da Costa Pereira Jerónimo,Visereitór, Proreitór, Reprezentante Prezidente Komisaun Funsaun Públika, Agapito da Conceição, Diretór Ezekutivu FDCH, Julio Aparicio, Dekanu, Vise-Dekanu, Diretór Departamentu, Diretór Jerál, Diretór Nasional, dosente, funsionáriu no konvidadu sira.
Média UNTL 
: Mario Jonio Mendonça
: Mario Jonio MendonçaFoto 
: Denilson A. Barros
: Denilson A. Barros