Universidade Nacional Timor Lorosa'e (UNTL) nia Faculdade de Educação Artes e Humanidades (FEAH), distribui serfikadu ba estudante na'in ualunulu (80), hafoin partisipa iha formasaun kona-ba hakerek sientífiku durante semestre ida, iha Auditóriu Museum Rezistensia Timorense nian, Díli (28/02).
Iha distribuisaun serfikadu ne'e, Magnífiku Reitór Profesór dr. João Soares Martins, MPH, Ph.D, hato'o parabéns ba formandu sira, tanba hetan ona esperiénsia husi formasaun ne'e no enkoraja atu fahe tutan ba kolega sira.
"Agradese ba profesora Renata Asunção ho ekipa ne'ebé fasilita ona formasaun ne'e ba estudante husi FEAH, parabéns mós ba formandu sira, tanba bele partisipa ona. Husu ba imi hotu atu partilla ba kolega seluk liuliu uza didi'ak oportunidade hodi mellora kapasidade", dehan Reitór.
Reitór mós solisita ba estrutura FEAH nian atu lori mós formasaun ne'e fakuldade seluk iha UNTL, tanba formasaun ne'e importante tebes hodi dezenvolve estudante sira-nia kapasidade iha hakerek proposta no monografia.
Iha fatin hanesan, Embaxadór Brazil nian iha Timor-Leste, Sr. Mauricio de Asis hatete, formasaun ne'e importante hodi kapasita estudante sira oinsa hakerek traballu sientífiku liuliu hanorin kona-ba maneira hakerek proposta no monografia.
"Formasaun ne'e importante atu tulun kapasita estudante sira iha prosesu elabora proposta no monografia, tanba nasaun presiza joven atu dezenvolve liuhusi UNTL", tenik Embaxadór.
Koordenadora ba Formasaun ne'e, Profesora Érica Marciano hatete, formasaun ne'e fahe ba tolu, Escrita Científica, Resenha e Revista ba estudante hamutuk 80 fahe ba aula tolu ho materia modulu 1 no 2.
“Durante formasaun ne’e foku ba Escrita Científica, Resenha e Revista ba estudante hamutuk 80 fahe ba aula tolu ho materia modulu 1 no 2 ”, dehan.
Partisipa iha serimónia distribuisaun sertifikadu ne'e, Estrutura FEAH, Dosente, no formandu sira.
Média UNTL 
: Leonia de A. da Costa
: Leonia de A. da CostaFoto 
: Mario Jonio Mendonça
: Mario Jonio Mendonça