UNTL-PRAC-FDCH DISEMINA INFORMASAUN BA ESTUDANTE BOLSEIRU KBIIT LAEK

Universidade Nacional Timor Lorosa’e (UNTL) nia Proreitor para os Asuntos Coperação Profesór Tomé Xavier Jerónimo hamutuk ho Diretór Ezekutivu Fundo Desenvolvimento Capital Humano (DE-FDCH) Profesór Julio Aparício disemina informasaun ba estudante bolseiru kbiit laek UNTL nian, iha Auditoriu Faculdade de Ciência Exatas nian, Díli (28/02).

 

Iha abertura Profesór Tomé Xavier Jerónimo hatete, objetivu husi hasoru malu ne’e atu fó hatene kona-ba bolseiru sira-nia prosesu estudu liga ba progresu estudante sira-nian.

 

‘’Ita-nia hasoru malu ohin loron atu buka hatene kona-ba estudante bolseiru kbiit laek sira-nia prosesu no progresu estudu ne’e la’o oinsa no atu fahe ba sira formuláriu husi FDCH ba sira atu priexe. Nune’e bele hatene estudante ne’e aproveita duni ba bolsa ne’e ka lae no uza duni tuir nesesidade ba estudu ka lae?’’, dehan Profesór Tomé.

 

 

Iha fatin hanesan Diretór Ezekutivu Profesór Julio Aparicio hatete, enkontru ida ne’e atu haree estudante sira nia aproveitamentu ba bolsu ne’ebé atribui no sira-nia progresu iha estudu atu nune’e hodi buka solusaun.

 

"Enkontru ida ohin hanesan maneira ida ami atu buka tuir benefisiáriu tuir termu ne’ebé iha mak “Buka tuir Benefisiariu” (BTB) hodi hatene loloos estudante sira-nia aproveitamentu akadémiku ne’e to’o iha ne’ebé. Tanba iha kontratu hakarek estudante bolseiru tenki iha aproveitamentu akadémiku 75% karik kada semestre mak lato’o, governu bele hapara sira-nia kontratu’’, dehan Diretór FDCH.

 

Profesór Julio mós husu ba estudante sira atu estuda makaas hodi bele aproveita didi’ak ba opurtunidade ida ne’ebe governu oferese, tanba ema barak mak seidauk hetan opurtunidade ida ne’e no governu nafatin buka dalan atu bele fó benefisia ba estudante sira tuir kapasidade ne’ebé iha no nia mós husu atu hakas aan hodi bele atinje valór ne’ebé di’ak.