Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, enkontru ho Estudante Hadomi Natureza (ESHANA), iha Sala-Videokonferénsia UNTL nian, Díli (19/02), hodi koalia kona-ba prosesu transformasaun ESHANA husi Faculdade de Economia e Gestão (FEG) ba universidade.
Magnífiku Reitór agradese ba membru ESHANA nia desizaun ne'e di'ak tebes bele lori ESHANA ba iha universidade nune'e promove ba sosiedade bele sai di'ak liután.
"Ezisténsia ESHANA nian mai iha UNTL imi tenki esforsu no imi sai hanesan nukleu ba inisiativa sira-ne'e, hodi kontinua no halo alargamentu ninia ramu ba iha fakuldade sira seluk ne'e importante hodi hatudu sentidu kuidadu, unidade no responsabilidade ba ita-nia ambiente rasik", tenik Reitór.
Iha sorin seluk Koodenadór ESHANA, Henrique Bento Pereira, hatete transforma ESHANA FEG ba universidade ne'e liuhusi asembleia estraordináriu ne'ebé ho objetivu hakarak avansa ba nível universitáriu hodi kumpri vizaun no misaun ne'ebé iha.
"Ita transforma ona ESHANA-FEG mai iha universidade UNTL ne'e atu sai ajente transformadór no konsultór ba estudante no sosiedade. Liuhusi transformasaun ne'e ami fiar katak bele habelar liután misaun ne'ebé estudante hadomi natureza iha atu bele fó impaktu pozitivu ba estudante, sosiedade iha baze no área rurál sira", dehan Henrique.
Koodenadór mós agradese ba Magnífiku Reitór bele aprova ona no simu ESHANA ba iha nível universitáriu, nomós tinan ne'e sei halo rekrutamentu ba membru foun ESHANA nian ba iha fakuldade sira ne'ebé sei hala'o iha fulan marsu nia laran.
Partisipa husi, Visereitora ba Asuntu Estudantís Profesora Lígia Tomás Correia, no ekipa husi Estudante Hadomi Natureza nian.
Média UNTL 
: Denilson Amandio Barros
: Denilson Amandio BarrosFoto 
: Denilson Amandio Barros
: Denilson Amandio Barros