Universidade Nacional Timor Lorosa’e (UNTL), nia Magnífiku Reitor Profesór dr. João Soares Martins MPH, Ph.D, hamutuk ho Ministru Ensinu Superior, Siénsia no Kultura (MESSK), S.E. José Honório da Costa Pereira Jerónimo, halo inaugurasaun ba edifísiu foun Faculdade de Agricultura (FAGRI) nian, Kampus Hera, Díli (16/02).
Iha diskursu Reitór agradese ba VIII Governu Konstitusionál, ne’ebé bele disponibiliza ona orsamentu ba konstrusaun edifísiu tolu, hodi fasilita prosesu ensinu apredisajen universidade nian, liuliu ba Faculdade de Agricultura.
“Agradese tebes ba VIII Governu liuhusi MESSK, ne’ebé disponibliza ona orsamentu mai UNTL ba konstrusaun ida-ne’e, nune’e bele responde ba preokupasaun fakuldade nian liga ba saladeaula”, dehan Reitór.
Reitor mós solisita ba estrutura FAGRI atu utiliza edifísiu ho di’ak, nune’e bele transforma Hera sai hanesan fatin sidade agrikultura no teknolojia ho siénsia moderna ba UNTL no Timor-Leste.
Iha fatin hanesan, Ministru Ensinu Superior Siénsia no Kultura S.E José Honório da Costa Pereira Jerónimo, agradese ba kompañia tolu Bobolait, Dany Star no Hedge Construction ne’ebé finaliza ona konstrusaun edifísiu foun ne’e bele garante kualidade UNTL nian iha futuru.
“Agradese ba kompañia tolu ne’ebé bele servisu hamutuk ho UNTL, hodi konklui projetu edifísiu tolu ne’e. Ne’e investimentu ne’ebé governu halo liuliu ba universidade nasionál no husu ita atu kuidadu hodi aposta ba futuru joven sira iha Timor-Leste”, tenik Ministru.
MESSK mós husu ba fakuldade atu uza didiak patrimóniu estadu nian no kuidadu, dezeja UNTL bele sai ezempalár ba instituisaun sira seluk, tanba investimentu ne’ebé governu apoiu hodi benefisia ba futuru.
Partisipa husi, Visereitór, Proreitór, Membru Governu, Dekanu, Vise Dekanu, Diretór Jeral, Diretór Nasional, Dosente, Estudante no Konvidadu sira.
Média UNTL 
: Mario Jonio Mendonça & Denilson A. Barros
: Mario Jonio Mendonça & Denilson A. BarrosFoto 
: Laurindo da Cruz & Eugenia de Jesus
: Laurindo da Cruz & Eugenia de Jesus