Universidade Nacional Timor Lorosa'e (UNTL) nia Gabineti Visereitoria ba Asuntu Estudantís (GVRAE) servisu hamutuk ho UN WOMAN no Jurídiku Sosial (JU,S) hodi fasilita formasaun ho tema “Prevensaun Asédiu Seksuál” ba funsionáriu no dosente sira, iha Auditóriu FEG nian, Díli (15/02).
Reprezentante VRAE nian, Sra. Judite Dias Ximenes hatete, formasaun ne'e importante tebes atu hasa'e koñesimentu no abilidade dosente no funsionáriu sira-nian kona-ba prevensaun violénsia bazeia ba jéneru no asédiu seksuál.
"Formasaun ne'e importante tebes atu hasa'e koñesimentu funsionáriu no dosente liuliu ba profesór ne’ebé hanorin materia transversais nune'e sira bele integra materia Edukasaun Sivika no Sidadania hodi hanorin ba estudante sira.
Asuntu ne’ebé partilla mak prevensaun asédiu seksuál, nune'e husu ba formandu sira atu aproveita no hodi bele aplika iha idaidak nia servisu fatin", dehan Sra. Judite.
Iha fatin hanesan, Formadora husi JU,S Sra. Maria Aguedas Bere hatete, formasuan ne'e hanesan atividade ida kona-ba Inisiativa Kampus Seguru liuhusi UN WOMEN ne'ebé halo Memorandu Entendimentu ho UNTL.
"Formasaun ne'e útil tebes ba iha universidade liuhusi inisiativa programa kampus seguru hodi bele kria universidade ida ne’ebé seguru, saudável no hamenus violasaun oinoin inklui asédiu seksuál iha UNTL" Tenik Sra. Maria.
Partisipa iha formasaun ne'e funsionáriu no Profesór Disciplinas Transversais no Asistente Tékniku sira inklui Reprezentante Asosiasaun Estudante sira husi kada fakuldade.
Média UNTL 
: Mario Jonio Mendonca
: Mario Jonio MendoncaFoto 
: Domingos Amaral /Leonia Araújo
: Domingos Amaral /Leonia Araújo