Universidade Nacional Timor Lorosa'e (UNTL), nia Diretór Direção Nacional Recursos Humanos (DNRH), Profesór Dr. Câncio Monteiro, hateten DNRH iha planu prioridade tolu ba 2024, (1) halo jestaun ba rekursu-umanu tuir esperiénsia servisu, (2) formasaun no (3) rekrutamentu ba vaga dosente 24.
"Prioridade tinan ne'e maka atu jere rekursu umanu tuir idaidak nia esperiénsia servisu nune’e bele garante efisiénsia no efikásia, formasaun, no rekrutamentu ba vaga dosente 24. Bazeia ba prioridade ne'e, ita sei halo aprezentasaun relatóriu ba Konsellu Jestaun hodi hetan apresiasaun hodi implementa”, dehan Diretór DNRH iha Kampus Sentrál UNTL nian, Díli (19/01).
Diretór DNRH mós konsidera importánsia ba formasaun jerál iha língua tantu Tetun, Portugés no Inglés. Iha mós formasaun espesífiku hanesan Jestaun Rekursu Umanu, Administrasaun, Informátika no Jestaun Laboratóriu ba tékniku fakuldade sira.
“Aleinde formasaun, prioridade rekrutamentu ba dosente hodi kompleta númeru husi 51 vaga ne’ebé prevé no konsege rekruta ona dosente (27) iha 2023 liubá, sei falta (24) vaga maibé proposta haruka ona ba CFP atu hetan autorizasaun nune'e bele halo prosesu rekrutamentu.
Iha mós atividade adisional tuir fonte ne’e katak, sei implementa sistema HRIS (Human Resources Information System), atu mellora sistema ne'e tuir nesesidade DNRH nian, nune'e bele sai hanesan informasaun ne'ebé kredivel ba funsionáriu hotu, nune’e bele lori universidade besik ba “Sentru Exelénsia”.
Média UNTL 
: Denilson Amandio Barros
: Denilson Amandio BarrosFoto 
: Eugenia de Jesus
: Eugenia de Jesus