Universidade Nacional Timor Lorosa’e (UNTL) nia Magnifiku Reitór Profesór dr. João Soares Martins MPH, Ph.D, ho nia estrutura hala’o inspesaun ikus ba edifilísiu foun Faculdade de Agricultura nian Building 2 no Building 3, iha Kampus Hera, Díli (09/02).
Reitór UNTL hateten, liuhusi inspesaun ikus ba projetu konstrusaun ba edifísiu foun Faculdade de Agricultura nian hatudu katak, iha ona kondisaun di’ak hotu no hein prepara ba halo termu entrega husi kompaña ba universidade.
“Iha inspesaun jerál ne’e, ita haree 99.9% hotu ona, hela de’it buat ki’ik balu mak seidauk hotu. Espera katak iha semana ne’e nia laran sira bele halo hotu ona, tanba ita planu inaugurasaun iha sesta semana oin, bainhira la iha buat ruma impede”, hatutan.
Bainhira halo ona inagurasaun Reitór garante katak universidade bele ona iha tan fasilidade liuliu ba Faculdade de Agricultura hodi bele ona uza ba prosesu aprendizajen.
Iha fatin hanesan, Visereitór ba Asuntu Administrasaun Finansas no Administrador Jeral, Profesór Hélio A. da Costa Xavier Mauquei hateten, kona-ba fasilidade karteira ba saladeaula ba edifísiu foun ne’e, halo hotu ona ho akizasaun kompletu.
“Em termos de fasilidade karteira ba saladeaula edifísiu foun ne’e iha 2023 ita halo hotu ona akizasaun kompletu total karteiras 1001, nune’e mós meza no kadeira ba funsionáriu sira ho montante la barak maibé ita asegura hotu ona iha fatin.”
Iha inspesaun ne’e halo husi ekipa kompostu husi, Magnifiku Reitór, Visereitór Administração Finansan e Administradór Jerál, Proreitór ba Asuntu Dezenvolvimentu Institusionál Prof. Dr. Lelis Gonzaga Fraga, Dekanu FAGRI Prof. Dr. Vicente de Paulo Coreia ho nia estrutura nomós ekipa Auditória no Inspesaun UNTL nian.
Média UNTL 
: Domingos Amaral
: Domingos AmaralFoto 
: Agostinho da Cruz & Domingos Amaral
: Agostinho da Cruz & Domingos Amaral