Universidade Nacional Timor Lorosa’e (UNTL) liuhusi Faculdade de Economia e Gestão (FEG) nia Estudante Hadomi Natureza (ESHANA) selebra ezisténsia ba dala 15 (2009-2024), iha Salaun Xanana Sport Center, Bairu Formosa nian DÍli (27/01).
Reprezenta Visereitora ba Asuntu Estudantís, atual Xefe Departamentu Alumni no Empregabilidade Elvino Alves Correia hato’o parabéns ba Grupu ESHANA ba existénsia ba dala 15, ne’e hatudu katak unidade iha grupu nian kontinua nafatin hodi hala’o atividade estra hodi aumenta koñesimentu Hadomi Ambiente.
“Ohin ita selebra tinan 15 ezisténsia ESHANA ne’e hatudu mai ita atu bele hadia di’ak liutan atividade sira ne’ebé ita hala’o hodi hasa’e no melhora di’ak liutan ita-nia kapasidade atu bele kuidadu ambiente ho diak no atu habelar siénsia ba ema hotu. Ba oin ita sei haree iha possibilidade atu la’ós de’it iha FEG maibé mai iha UNTL nian”, dehan Elvino.
Iha fatin hanesan, Visedekanu Asuntu Estudantís FEG nian, Profesor Aleixo Ximenes hato’o agradese ba fundador sira ne’ebé funda ona ESHANA iha FEG ba estudante sira, tanba bele forma estudante nia mentalidade ba hadomi ambiente.
“Atividade ESHANA nian estudante sira hala’o dalabarak ba iha Munisípiu, atu haree no kuida ambiente no estudante sira la’o ain ba visita fatin-fatin. Estudante sira mos halo sosializasaun ba komunidade no hanesan manorin nain sempre fó espasu atu hala’o atividade sira, maibé mós labele haluha katak sira mai iha ne’e atu hala’o estudu”, dehan Profesor Aleixo.
Koordenadór ESHANA nian Henrique Bento Perreira hatete, aniversáriu ESHANA nian selebra ona iha loron 23 Janeiru maibé kondisaun balu mak adianta no foin realiza iha 27 Janeiru ne’e.
“Ha’u agradese ba fundadór sira mak funda ona grupu ne’e, no atividade barak mak hala’o ona ita labele konta ida ba ida. Maibé ne’e atu motiva ita hodi lori mós kolega sira atu bele hala’o asaun kiik liuhusi atividade limpeza jeral, la’o ain ba munisípiu, halo sosializasaun, hadomi natureza no habelar siénsia ba malu hodi kontribui ba dezenvolvimentu”, hatutan.
#TimorLeste # UNTL# FEG# ESHANA 29 Janeiru 2024
Média UNTL 📝: Laurindo da Cruz Gomes
Foto 📷: Laurindo da Cruz Gomes