Universidade Nacional Timor Lorosa’e (UNTL ) nia proposta ba Ministériu Ensinu Superior, Siénsia no Kultura (MESSK) atu simu estudante foun ba tinan akadémiku 2024 hamutuk rihun haat atus hitu rua nulu (4.720) ne’ebé sei fahe ba fakuldade sanulu no kursu haatnulu resin tolu iha universidade.
“UNTL submete ba ministériu katak, sei simu estudante hamutuk rihun haat atus hitu ruanulu (4.720), ne’ebé fahe ba Fakuldade sanulu no kursu haatnulu resin tolu. Tan ne’e ami espera katak ho númeru ne’ebé ami propoin, bele koresponde duni no labele liu ida-ne’e”, dehan Reitór, bainhira partisipa iha abertura ba korresaun pontu ezame ba estudante foun nian, iha Salaun MESSK, Díli (8/01).
Relasiona ho asuntu ne’e, Ministru Ensinu Superior Siénsia no Kultura (MESSK) S.E. José Honório da Costa Pereira Jerónimo, hatete atu asegura kualidade ensinu superior UNTL ho IPB maka, parte tékniku sira tenke servisu ho rigór no transparánsia, nune’e komunidade la bele kestiona kona ba publikasaun rezultadu estudante ne’ebé asesu ba UNTL ho IPB.
“Ha'u husu ba tékniku sira kumpri ba regra ne’ebé iha atu nune’e bele halo selesaun ho rigór no transparánsia ba estudante sira ne’ebé maka ho valór di'ak no tenke priense duni kritériu ne’ebé iha. Nune’e ba futuru bele prodús rekursu ne’ebé kualidade hodi kontribui ba dezenvolvimentu Timor-Leste nian”, dehan Ministru.
Ministru dehan estudante hirak ne’ebé ho valór haatnulu resin neen to neennulu maka merese hodi asesu ba UNTL ho IPB, tan ne’e Ministériu bazeia de'it ba total dadus husi proposta ne'ebé simu husi UNTL.
Serimónia abertura ne’e partisipa husi Prezidente Komisaun ba Koresaun Valór, atual Diretora Jerál Ensinu Superior, Sra. Maria Filomena Lay Guterres, Prezidente Institutu Politékniku Betano, Acacio Cardoso Amaral, Diretór Jerál, Diretór Nasional, Xefe Departamentu no konvidadu sira.
#TimorLeste #UNTL #MESSK 8 Janeiru 2024
Média UNTL 📝: Mario Jonio Mendonça
Foto 📷: Leonia de A. da Costa