Universidade Nacional Timor Lorosa’e (UNTL) nia Diretór Direção Nacional Avaliação Académica e de Garantia da Qualidade Interna (DNAAG-QI) Sr. Agostinho Quelo iha nia knaar fatin Kampus Sentral UNTL nian, Díli (11/01), hatete iha tinan 2024 ne’e bazeia ba planu, Departamentu sanulu resin haat (14) sei hetan avaliasaun programátika husi ANAAA iha 2024.
“Bazeia ba ami-nia planu, ami sei halo reuniaun ho Magnífiku Reitór Interinu nune’e, bele haree fakuldade sira ne’ebé mak preparadu ona atu halo avaliasaun hodi prienxe rekezitu bazeia ba template no indikadór sira ANAAA (Agência Nacional para Avaliação e Acreditação Académica) nian.
Ita bele halo avaliasaun iha tinan ne’e no kursu ne’ebé seidauk prienxe rekezitu husi ANAAA nian ita sei planu fali ba tinan oin. Ami mós sei halo formasaun no disemina informasaun ba fakuldade sira atu bele prepara ba avaliasaun ho di’ak liután”, dehan Diretór Quelo.
Diretór ne’e hateten, iha tinan 2024 tuir planu sei halo avaliasaun ba departamentu sanulu resin haat (14) ne’e husi Faculdade de Educação, Arte e Humanidade (FEAH), Faculdade de Agricultura (FAGRI), Faculdade de Engenharia Ciência e Tecnologia (FECT), Faculdade de Turismo, Arte Indústria e Culturas Creativas (FTAICC), Faculdade de Direito (FADIR).
#TimorLeste #UNTL #DNAAG-QI 12 Janeiru 2024
Média UNTL 📝: Laurindo da Cruz Gomes
Foto 📷: Eugenia de Jesus Guterres