Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) nia Visedekanu Profesór Carlos B. Tilman reprezenta Dekana hodi abertura debate ho tema “Haboot koñesimentu iha peskiza no debate sei kontribui ba formasaun rekursu umanu ne’ebé kualidade” durante loron rua (04-05), iha salaun Instituto Nacional de Saúde (INS) Comoro, Díli.
Visedekanu Asuntu Kooperasaun, Peskiza no Kontrolu Kualidade, Profesór Carlos B.Tilman hatete, debate ne’e atu reforsa estudante sira iha área saúde nian, bele mellora koñesimentu hodi aprende siénsia di'ak liután.
“Espera liuhusi debate ne’e, fó rezultadu ne’ebé di'ak liuliu pontu de vista akadémiku nian no sai hanesan referénsia iha termu hodi aprende di'ak liután, kona-ba moras no debate asuntu Asian Parlamentar. Ne’e hodi haree liuba rekursu iha área formasaun ensinu superiór nian,”dehan Profesór.
Iha fatin hanesan Prezidente Komisaun Organizadora Ofelia Falda Antonia Freitas hateten, debate ne’e ho tipu rua Debate Sientífiku no Debate Asian Parlamentar atu aumenta koñesimentu estudante sira-nian iha parte ida bele koko estudante sira-nia mentalidade.
“Debate ida-ne’e fahe ba tipu rua debate sientífiku no debate asian parlamentar atu mellora estudante sira-nia konesimentu iha área saúde nian no oinsa debator sira buka argumentu pro no kontra ba mosaun ne’ebé sira hetan.
Debate sientífiku kompostu husi departamentu haat mak hanesan Medisina Geral, Parteira, Enfermagem no Farmasia. Debate asian parlamentar ne’e inkliu hotu departamentu 6 husi Medisina Geral , Parteira, Enfermajem, Farmasia, Ciências Biomédicas e Laboratoriais no Nutrição” hatete Ofelia.
Partisipa iha atividade ida ne’e estrutura fakuldade nian, dosente, estudante no konvidadu sira.
#TimorLeste # UNTL #FMCS 05 Dezembru 2023
Média UNTL 📝: Eugenia de Jesus
Foto 📷: Pio Ximenes