#TimorLeste #UNTL #FEG #ESHANA #COVID19#COVID19TL 18 Maiu 2022
Universidade Nacional Timor Lorosa’e (UNTL), liuhusi Fakuldade Ekonomia no Jestaun (FEG) nia Asosiasaun Estudante Hadomi Natureza (ESHANA) desloka estudante na’in 76 ba munisípiu Lautem hodi Komemora Loron Restaurasaun Independénsia Timor-Leste nian ba dala 20.
Iha resintu FEG-UNTL nian (18/05), Visedekanu Asuntu Estudantís, Profesór Francisco Assis de Lima, hatete, atividade refere partense ba estrakurrikulár, ne’ebé kada tinan sempre hala’o hodi komemora loron istóriku sira iha Timor-Leste hanesan loron Proklamasaun no Restaurasaun Independénsia. 
“Atividade ne’e, husi inisitiva estudante sira ne’ebé envolve-an iha ESHANA-FEG nian, hodi komemora loron restaurasaun independénsia Timor-Leste nian ba dala 20 tinan ne’e iha munisipiu Lautem, aliende ne’e sira mós sei la’o ain hodi haree área floresta ne’ebé eziste iha ne’ebá”, tenik Visedekanu. 
Koordenador ESHANA-FEG UNTL Joanito Lopes Oliveira hatete, atividade ne’ebé organiza hodi treina no kapasita mós membru foun sira, iha ámbitu komemorasaun Restaurasaun Independénsia ba dala 20. 
“Objetivu husi atividade ne’e ami atu anima no komemora hamutuk ho komunidade iha área rurál hodi nafatin tane no valoriza ita-nia loron istóriku sira, iha atividade seluk ne’ebé ami sei realiza, ami sei halo peskiza, sensibilizasaun no limpeza jerál, hasa’e bandeira RDTL iha suku Com nian iha parte tasi, suku Mapitine ami sei hasa’e bandeira RDTL nian iha foho Paixhau”, realsa Joanito.
Média UNTL 📝: Altur Ramos
Foto 📷: Altur Ramos