#TimorLeste #UNTL #FEAH #COVID19 #COVID 19TL 08 Maiu 2022
Universidade Nacional Timor Lorosa’e (UNTL) liuhusi Fakuldade Edukasaun Arte i Umanidade (FEAH) komemora Loron Mundial Língua Portugeza hanesan mós Lian Ofisiál ho tema “Unidos pela Língua Portuguesa” iha Kampus Liceu UNTL nian, Díli (05/05).
Visedekanu Asuntu Estudantil, Profesór Sabil José Branco, iha abertura hatete, Língua Portugeza hanesan Lian ofisiál Timor-Leste nian, ne’ebé hatur ona iha Konstituisaun, no FEAH nia graduadu sira mak asume papel importante atu promove.
“Ohin ita hamutuk selebra loron mundiál no importante ba timoroan hotu komemora loron Lian Portugés, tanba ita mós pertense ba Komunidadade País Lian Portugés (CPLP) nian, hanesan mós identidade Timoroan nian , ita orgullu pertense país uníku iha Sudeste Asiátiku prinsipalmente akadémika utiliza hodi aprende siénsia", tenik Visedekanu.
Profesór Sábil deseja katak estudante universidade nian liuliu FEAH ne'ebé prepara futuru profesór, importante tebes promove Lian Portugés iha prosesu ensinu.
Diretór Institutu Nasionál Linguistíka (INL) no Centro da Língua Portuguesa (CLP) Profesór Benjamim de Araújo e Corte-Real, Ph.D hatete, sentidu husi loron 5 Maiu hanesan ezisténsia loron internasional lian portugés, hanesan loron lian nian no kultura CPLP, hodi hanoin fila fali akordu entre Portugal ho Indonesia ba realizasaun referendum 1999.
“Língua Portugeza ohin loron dezenvolve ba bebeik iha ita-nia sosiedade, neneik ita sei manan difikuldades atu aprende portugés, experiénsia ne’ebé iha pasadu, iha tinan 2001, joven lubuk ida rekruta ba programa kooperasaun ho Portugál nian, joven sira iha difikuldade portugés, maibé ho tempu ohin ema hotu bele ko'alia. tanba ne'e ita-nia lian, kultura no ita-nia istória", tenik Diretór INL.
Reprexentate Diresaun Nasionál Ministériu Negósiu Estranjeiru i Koperasaun CPLP nia Diretór Dr. Flaviano Faria hatete, Diresaun Nacionál da CPLP, iha funsaun prinsipál hodi halo mobilizasaun no akulturasaun, ne’ebé relasiona ho atividade ba komemorasaun loron Mundial nian, hodi reforsa komprimísiu no hametin relasaun entre Timor-Leste ho CPLP. 
“Agradese ba inisiativa no kongratula Magnífiku Reitór UNTL ne’ebé orienta Professor Doutor Benjamin de Araújo Corte-Real kordena ho departamentu sira hotu iha UNTL, ho sentidu planu realizasaun atividade sira hodi selebra loron importante ida ohin, ne’ebé sei hala’o durante loron 3-7 fulan Maiu, hodi konvida ita hotu, embaixadór, reprezentante CPLP, G7+ no seluk tan, hamutuk ita selebra atividade ida ne’e,”akresenta Faria.
Iha fatin hanesan, Embaixadór Brasíl iha Timor-Leste, Dr. Maurício Madeiros de Assis hatete, jovens mak futuru lider nasaun nian, Portugal mak istória inísiu língua portugeza, mezmu pais ki’ik ida, maibé iha forsa bele to’o iha kontinente Amérika, Áfrika nomós Ázia.
“Ha'u orgullu tebes ba joven no estudante sira-nia prezensa iha ne’e, agradese tebes ba aseita kooperasaun ida ne’e, ami nafatin vontade koopera ho Timor-Leste. Timor iha ami nia fuan, no brasileiru hotu koñese Timor nia istória husi Luta ba independénsia tanba Timor irmaun ho Brazíl, sempre iha ami nia fuan,”akresenta Dr Maurício.
Eventu refere organiza husi FEAH, ho apoiu husi Leitorado Brasileiro iha UNTL, no hetan partisipasaun husi Vise Dekanu Asuntu Administrasaun i Finansas Professor Elvis Fernandes Brites da Cruz, Embaixadora Portugal iha Timor, Dra Maria Manuela Freitas Bairos, Adida Kooperasaun Portugál, Vise Cônsul Brasil iha Díli, delegada Fundasaun Oriente, Dra. Joana Saraiva, Diretór Sentru sira, Koordenador Projeto Foco-UNTL Profesor Dr. Paulo M. Faria, Diretór Departamentu, dosente no estudante sira. 
Media UNTL 📝: Altur Ramos
Foto 📷: Altur Ramos