UNTL NIA ESTUDANTE NA’IN 30 HETAN BOLSU ESTUDU HUSI FUNDASAUN OSAKA GAS 🇯🇵

Visualizações: 328

#TimorLeste #UNTL #OsakaGas 24 Janeiru 2022

Uiversidade Nacional Timor Lorosa’e (UNTL), nia estudante na’in tolu nulu (30) ne’ebé selesionadu ho prestasaun akadémika di’ak, hetan bolsu-estudu husi Fundasaun Osaka Gas (Osaka Gas Foundation of International Cultural Exchange), Japaun 🇯🇵, liuhusi kooperasaun ho Japan International Cooperation Agency (JICA).  ga 1

Iha Auditóriu Fakuldade Enjeñaria, Siénsia no Teknolojia (FECT) UNTL nian, Díli (21/01), Magnífiku Reitór, Profesór dr. João Soares Martins, MPH, Ph.D, hateten bolsu estudu husi Osaka Gas Foundation, hala’o dezde 2013, no sei kontinua  to’o 2024 no kada tinan oferese bolsu estudu ba estudante na’in 30. 

“Ita entrega tan bolsu-estudu ne’e ba na’in tolu nulu ne’ebé selesionadu ho valór di’ak ho intensaun atu  bele eleva sira-nia koñesimentu iha área Enjeñaria nian nune’e ba futuru bele kontribui ba dezenvolvimentu Siénsia no Teknolojia iha Timor-Leste liuhusi estudu ne’ebé Fakuldade oferta”, hatutan Reitór.ga 2

Iha fatin hanesan, reprezentante Embaixadór Japaun nian iha Timor-Leste, S.E Sra Kazumi Yamada, hato’o parabéns ba bolseiru sira no Japaun hakarak oferese oportunidade ida refere ba UNTL liuliu FECT nune’e bele aprende no hasa’e kapasidade iha área Enjeñaria nian.

“Agradese ba kooperasaun ida ne’e hodi tulun joven sira, liuliu hasa’e kapasidade umana iha area ida-idak nian no dezesu atu estudante sira bele uza oportunidade ne’e ho di’ak nune’e bele kontribui ba UNTL nomós ba Timor-Leste”, tenik reprezentante.

Proreitora ba Asuntu no Kooperasaun, Profesora Doutora Lídia Gomes, hateten bolsa interna ne’e fó husi Osaka Gas Foundation no kritéria mak sira tenki iha valór mínimu 3,0 nomós tenki domina língua inglés no portugés. ga 3

“Estudante sira na’in 30 ne’e, feto 15 no mane na’in 15, bolsa ne’e atu enkoraza nafatin estudante sira atu estuda maka’as no mantein nafatin ho imi-nia valór ne’ebé iha nune’e bele kompete, hodi kontinua hetan iha tinan oin mai”, tenik Proreitora.

Partisipa husi Visereitora ba Asuntu Estudantís (VRAE), Profesora Eng.ª Lígia Tomás Correia, M.Sc, Dekanu Fakuldade Enjeñaria Siénsia no Teknolojia, Profesór Adalfredo G. da Silva  Ximenes, M.Eng, Diretora-Jerál Ensinu Superiór no Siénsia, MESSK, Dra. Maria Filomena Lay Guterres, Reprezentante JICA iha Timor-Leste, Sr. Ko Goto P.E, Dosente, Estudante, inklui konvidadu sira.ga 4

Média UNTL 📝 :  Denilson Amandio Barros

Foto 📷 :  Denilson Amandio Barros