#TimorLeste #UNTL #COVID19 #COVID19TL 20 Janeiru 2022
Universidade Nacional Timor Lorosa’e (UNTL) nia Magnifiku Reitór, Profesór Doutór João Soares Martins MpH, PHD, halo abertura ba sorumutuk distribuisaun Orsamentu Jerál Estadu (OGE-2022) ba Fakuldade, Diresaun no Unidade sira atu ezekuta bazeia ba dekretu lei nu.1/2022 ne’ebé dekreta ona husi Prezidente Repúblika Timor-Leste, iha Auditóriu-Liceu UNTL nian, Díli (17/01).
“Agradese tebes ba Visereitór ba Asuntu Administrasaun Finansas no Administradór-Jerál nomós Proreitór ba Planeamentu Monitorizasaun no Avaliasaun nian, tanba bele prepara sesaun ida ne’e, maibé husu ita atu la haluha hatama relatóriu trimestrál nian ba Governu, agradese ba mós ba estrutura sira hotu tanba ita konsege ezekuta OGE 2021 to’o 81.39%, tanba ne’e tenke ezekuta ona planu sira liuliu atividade primeiru trimestre ba 2022” tenik Reitór.
Iha fatin hanesan, tuir Visereitór ba Asuntu Administrasaun Finansan no Administradór-Jerál, Profesór Hélio A.X Mauquei, Ph.D, hatete, distribuisaun Orsamentu Jerál Estadu 2022 nian ho total $ milaun sanulu resin neen resin ba estrutura universidade nian, inklui Fakuldade, Unidade, Diresaun sira.
“Ohin ita distribui OGE-2022 nian bazeia ba dekretu lei Nu.1/2022 ne’ebé dekreta husi Prezidente Repúblika Timor-Leste, tanba ne’e UNTL nia OGE-2022 ($ milaun sanulu resin neen resin) ne’ebé aprovasaun ikus husi Parlametu Nasional no promulgadu ona”, dehan Dr. Hélio.
Partisipa iha sorumutuk ne’e Visereitór, Proreitór, Diretór Jerál, Diretór Nasionál, Diretór Sentru sira, Dekanu, Visedekanu no Xefe Departamentu sira.
Média UNTL 📝 : Leonia de A. Da Costa
Foto 📷 : Pio Belo Ximenes