#TimorLeste #UNTL #COVID19 #COVID19TL 09 Novembru 2021 - Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, PhD, hamutuk ho estrutura atualiza progresu ezekusaun Orsamentu Jerál Estadu (OJE-2021) nian no aprezenta proposta OJE-2022 ba Komisaun G ne'ebé trata asuntu Edukasaun, Juventude, Kultura no Sidadania, Parlamentu Nasionál, iha Gabinete Komisaun nian, Díli (09/11).
Magnífiku Reitór hateten, UNTL ezekuta ona 56% husi OJE-2021 nian no proposta ba orsamentu jerál estadu 2022 nian, universidade propoin ($) millaun 22.
“Ezekusaun OJE 2021 nian, ami ezekuta ona 56% no espera katak ami bele remata ezekusaun ne’e, ami-nia proposta ba OJE 2022 nian ho montante ($) 22 millões maibé pakote fiskál to mai ho milaun ($)16, ami mós komprende tanba ita enfrenta hela situasaun COVID-19”, tenik Reitór.
Reitór mós rekoñese katak, atualmente universidade nia fasilidade prátika, biblioteka ba estudante sira seidauk sufisiente, no saladeaula, maibé iha ona konstrusaun edifísiu foun tolu, ida utiliza ona, rua mak sei iha hela prosesu konstrusaun no planu sei harii tan edífisiu tolu no kompletu fasilidade sira iha 2022.
Iha fatin hanesan, Prezidente Komisaun G nian, Sr. António Verdial de Sousa hateten, Komisaun G rejista ona proposta ne’ebé aprezenta husi UNTL no sei buka meiu hodi responde ba proposta ne’e, nune’e bele atinji objetivu instituisaun nian.
“Ami sei buka meiu hodi bele responde ho pozitivamente, tanba edukasaun sai hanesan fatór importante ba ita-nia oan sira-nia futuru”, hateten Prezidente Komisaun G.
Iha sesaun aprezentasaun ne’e lidera husi Prezidente Komisaun G, no partisipa másimu husi membru Komisaun nian, no estrutura universidade nian mak Reitór, Visereitór no Proreitór sira.
Média UNTL 
: Leonia de A. da Costa
: Leonia de A. da Costa: Mateus Gonçalves