#TimorLeste #UNTL #PRAPA #COVID19 #COVID19TL 29 Agostu 2021 - Universidade Nacional Timor Lorosa’e (UNTL) nia Proreitoria ba Asuntu Provedoria no Akonsellamentu (PRAPA), liuhusi divisaun Campus Ministry, realiza “Bible Camping” hodi fó formasaun umana no dezenvolvimentu karakter ba estudante sira, iha Rezidénsia Konventu Padre Canossiano-Hera, Dili (27/10).
Tuir Proreitór ba Asuntu Provedoria no Akonsellamentu (PRAPA), Profesór Tomé Xavier Jerónimo, SH, M.D, katak atividade Bible Camping ho objetivu, atu hasa’e foin-sa’e sira-nia koñesimentu iha karákter moris nian.
“Atividade ne’ebé ita realiza hamutuk iha Campus Ministry ne’e importante tebes, tanba atu tranzmite ba estudante no joven sira kona-ba oinsá vida relijioza no karákter morál iha família, sosiedade no nasaun”, tenik Profesór Tomé.
Proreitór mós dezeja katak, atividade ne’e sei kontinua hala’o iha futuru, nune’e hatutan matenek hirak ne’e ba jerasaun foun sira no lori universidade ba konstrui sosiedade ida ne’ebé prontu simu valór no hadaet ba jerasaun tuir mai.
Iha fatin hanesan, Kordenadora Campus Ministry nian, Profesora Glenda Carvalho hateten, Campus Ministry iha programa ida atu apoiu joven sira iha kampus, tanba ne’e Campus Ministry enkaisa-an iha PRAPA hodi akumula estudante hotu iha UNTL, inklui joven sira aprende organiza eventu.
“Atividade ne’e kada tinan sempre hala’o, no agora ita halo iha ne’e, ita halibur estudante sira atu aprende hamutuk, nune’e implementa karakter morál no moris nu’udar kristaun iha sosiedade, tanba estudante sira labele matenek de’it iha siénsia maibé matenek mós iha espirituál,” dehan.
Koordenadora ne’e mós agradese ba UNTL tanba bele servisu hamutuk, no fasilita estudante sira hodi realiza atividade refere, no kontinua solisita ba futuru kontinua apoiu Campus Ministry.
Iha atividade refere, oradór sira mak Sr. Nívio Magalhães ne’ebé aprezenta tópiku “Dezenvolvimentu Joven Milineal”, Sr. Alberto Piedade ho tópiku “Karaterístiku Joven iha Era Milenial” no hetan partisipasaun másimu husi estudante sira inklui joven Canossiano sira.
Média UNTL 
: Leonia de A. da Costa
: Leonia de A. da CostaFoto 
: Agustinho da Cruz e Silva
: Agustinho da Cruz e Silva