#TimorLeste #UNTL#USAID #COVID19 #COVID19TL 28 Outubru 2021 - Universidade Nacional Timor Lorosa’e (UNTL) nia estudante na'in ruanulu resin rua (22) partisipa iha Workshop kona-ba Mudansa Klimátika, iha auditóriu Liceu UNTL Nina, Díli (28/10), hodi hasa’e koñesimentu iha impaktu ba mudansa klimátika.
Tuir partisipante João Baptista katak iha workshop ida ne’e sira aprende liu kona-ba mudansa klimátika no oinsa bele rezolve problema mudansa klimátika ka alterasaun klimátika iha Timor-Leste.
“Ha'u espera katak depois husi workshop ida ne’e, bele eleva liután ha'u-nia koñesimentu, liuliu kona-ba alterasaun klimátika tanba ita haree ida ne’e sai hanesan problema globál ne’ebé mundu enfrenta, nune'e, bele eleva liután joven sira-nia koñesimentu atu kontribui ba prevensaun ba iha alterasaun klimátika refere”, tenik estudante João.
João mós hatutan tan katak, ba oin sei aplika koñesimentu ne'ebé hetan liuhusi programa ruma atu bele fahe ba iha sosiedade sira liu-liu iha área rural sira.
Iha fatin hanesan formadór USAID nia Kordenadór Nasionál Turizmu nian, Sr. Fonseca Miranda, hateten katak atividade refere atu fó ba estudante sira kona-ba mudansa klimátika atu sira kompriende kona ba saida mak mudansa klimátika no nia impaktu ne’e saida, inklui ho buka mekanizmu atu bele resolve kestaun alterasaun klimátika.
“Objetivu atu fahe informasaun kona-ba mudansa klimátika ba estudante sira, iha tempu hanesan atu hasa’e koñesimentu ka kapasidade estudante sira-nian iha mudansa klimátika atu estudante sira bele kompriende maneira mitigasaun ka adaptasaun ba iha problema alterasaun klimátika nian”, tenik Sr. Fonseca.
Atividade workshop refere realiza tanba servisu hamutuk entre Gabinete Visereitoria ba Asuntu Estudantís (VRAE) ho USAID no partisipa husi reprezente estudante sira husi fakuldade sia iha universidade nasionál.
Média UNTL : Laurindo da Cruz Gomes
Foto : Laurindo da Cruz Gomes