#TimorLeste #UNTL #UNESCOTimorLeste #COVID19 #COVID19TL 16 Agostu 2021
Universidade Nacional Timor Lorosa’e (UNTL) liuhusi Fakuldade Siénsia Sosiál (FCS) nia Departamentu Komunikasaun Sosiál (DCS) hetan tan apoiu ekipamentu (kamera, mic, tripod, komputadór, projetór), husi United Nations Scientific and Cultural Organization (UNESCO) iha Timor Leste.
Hafoin simu ekipamentu sira, iha edifísiu UNESCO nian, Díli, (13/08), Diretór DCS nian, Profesór Marcelino Ximenes Magno, MA, agradese ba apoiu ne’ebé UNESCO ne’ebé oferese importante hodi fasilita prátika ba estudante sira.
“Agradese tebes ba Asesór UNESCO ba Komunikasaun no Informasaun Jakarta, Lim Ming Kuo, Kordenadora UNESCO nian Sra. Adelina Tilman no Sr. Elizabeth Soares ne’ebé ho esforsu apoiu ona ekipamentu sira, no antes ne’e UNESCO mós reabilita Klínika Jornalizmu ba DCS, fasilita formasaun ba estudante sira no formasaun sira seluk”, hatutan Diretór.
Profesór Magno mós hatutan katak ho apoiu sira ne’ebé parte UNESCO fó apoiu tebes DCS liuliu iha preparasaun ba akredisaun nian, no formasaun kualidade ba estudante sira-nian, no departamentu dezeja atu kontinua kooperasaun.
Iha fatin hanesan, Koordenadora UNESCO, Sra. Adelina Tilman, hatete, ho apoiu ne’ebé oferese bele ajuda universidade nia DCS nomós sei kontinua apoiu formasaun no sei apoiu mós ekipamentu sira seluk iha futuru.
“Ami la’ós foin apoiu UNTL nia DCS maibé ami apoiu ona formasaun no ekipamentu sira hodi ajuda hasa’e estudante sira-nia koñesimentu iha área jornalismu nian no ba futuru ami kontinua apoiu formasaun sira no ekipamentu”, dehan Cordenadora UNESCO.
Ekipamentu sira mak kamera ida, dekstop rua, projetór ida, micro, tripod, no ekipamentu sira seluk inklui sertifikadu ba estudante sira ne’ebé remata ona formasaun jornalizmu báziku. No faze tuir mai DCS sei halo pedidu ba Universidade hodi rejista nu’udar patrimóniu universidade nian.
Eventu entrega ekipamentu sira ne’e, Vise Diretór DCS Profesór Roberto da Costa Pacheco SH.MDH, Profesór Miguel Gonçalves no husi UNESCO nian Project Assitent Media Project Sra. Elizabeth Soares.
Média UNTL : Leonia de A. da Costa (Estajiária)
Foto : Laurindo da Cruz (Estajiáriu)