Universidade Nacional Timor Lorosa’e (UNTL) liuhusi Direção Nacional Logística e Manutenção (DNLM) no Direção Nacional Património e Bens realiza atividade avaliasaun hodi avalia servisu atendementu manutensaun no operasional hodi mellora servisu ba oin.
Visereitór ba Asuntu Administrasaun Finansa no Administradór Jerál, Profesór Helio A. X. Mauquei hatete, sesaun ne’e ho objetivu atu hala’o avaliasaun no diskusaun kona-ba atividade atendimentu 2024 nian no aprezenta servisu sira tuir sistema digitalizasaun ne’ebé la’o hela.
‘’Espera katak husi sesaun ida-ne’e atu bele hadiak liutan servisu atendimentu ba ita-nia estudante, dosente nomós ba funsionáriu sira. Iha oportunidade ida-ne’e importante tebes ba ita nu’udar Xefia, ne’e iha papél ne’ebé hanesan atu asegura funsaun sira hodi mellora servisu sira ho diak.
Ita mós presiza hadia ita-nia komunikasaun, tanba dalaruma komunikasaun mak sai bareira ba ita iha servisu fatin’’, Dehan VRAAFAG Mauquei, iha Auditóriu FCE nian Balide, Díli (09/04).
Diretora DNLM no DNPB Sra. Fátima Odete Monteiro hatete, atividade ne’e halo atu aprezenta prosedimentu utilizasaun patrimóniu bens ba xefia sira, no halo avaliasaun ba atendementu ba diresaun nian liuliu iha manutensaun no operasionál.
‘’Atividade ne’e konvida imi hotu mai atu hanoin hamutuk hodi halo avaliasaun ho sériu, hodi hadia atendementu di’ak iha futuru ba iha instituisaun no ami sei aprezenta ba patrimóniu ne’ebé rejistu ona iha sistema dijitalizasaun nian’’, Dehan Diretora DNLM Monteiro.
Partisipa iha atividade ne’e Xefe Departamentu Administrasaun sira husi fakuldade, diresaun, unidades no pontu-vokal sira.
Média UNTL 
: Laurindo da Cruz Gomes
: Laurindo da Cruz GomesFoto 
: Laurindo da Cruz Gomes
: Laurindo da Cruz Gomes