Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, hamutuk ho estrutura no sívitas akadémika, presta omenajen ba matebian Dr. José António Lourenço da Costa ne’ebé termina nia jornada moris, iha HNGV, Díli 9 Abril 2025.
Reitór hatete, UNTL sente lakon tebes rekursu kualifikadu ida ne'ebé durante ne'e servisu makaas, tanba ne'e, lori sívitas akadémika universidade nian, hato’o sentidu kondelénsia ba família liuliu ba matebian.
“Ohin ita hotu hakfodak ho situasaun ida ne'ebé ita hotu la espera, ohin dader ami sei hamutuk hela, maibé liu de’it oras hira nia laran, Maun Zeto sees husi ita hotu nia leet, la’ós família de’it, maibé UNTL mós lakon dosente no motivador di’ak. Ho nia sakrifísiu tomak, lori sivitas akadémika nia naran hakarak hato'o sentidu kondolénsia ba família hotu, ”, tenik Reitór iha rezidénsia matebian nian, Cacaulido, Díli, (9/04).
Reitór hatutan, todan no defísil tebes ba situasaun ida ne'e ba UNTL, tanba iha susar, dezafiu barak ne'e sempre servisu hamutuk, nune’e ho sivitas tomak nia orasaun atu matebian bele hetan roman di'ak iha Maromak Nia Uman.
Matebian José António Lourenço da Costa moris iha loron 22 Jullu 1970 iha Fatumean, Covalima. Hakotu nia peregrinasaun iha Ospital Nasional Guido Valadares (HNGV) iha 9 Abril 2025, ho idade 55.
Matebian ho knaar ikus nu’udar Diretór Centro Nacional de Investigação Cientifica no asume mós knaar nu’udar Dekanu Interinu iha Faculdade de Filosofia e Ciências Humana (FFCH-UNTL).
Média UNTL 
: Leonia de Araújo da Costa
: Leonia de Araújo da CostaFoto 
: Agostinho da Cruz e Silva
: Agostinho da Cruz e Silva