Universidade Nacional Timor Lorosa'e (UNTL), nia Faculdade de Engenharia Ciência e Tecnologia (FECT) hamutuk Plan International no Conservation of Enviroment Timor-Leste (CETL), halo lansamentu ba Projetu Obra Instalasaun Arte Resiklajen, iha Resintu Kampus, FECT-Hera, Díli (09/04).
Dekanu FECT, Mestre Adalfredo Ximenes, agradese ba Plan Internasional nomós CETL ne'ebé suporta estudante sira hodi bele hatudu kreatividade arte no inovasaun hodi salva ambiente liuhusi halo resiklajen ba plástiku bele sai arte ida ne'ebé furak.
"Lori fakuldade nia naran hato'o agradesimentu ba Plan Internasional no CETL ne'ebé suporta ona ami nia estudante sira, no ba futuru ami prontu nafatin atu servisu hamutuk nune'e bele forma joven sira hodi loke hanoin, liuhusi kreatividade ema ida nian", dehan Dekanu.
Iha fatin hanesan, Koordenadór Conservation of Environment Timor-Leste (CETL), Vicquiano G. Fonseca hateten, atividade ne'e hanesan atu loke dalan prosesaun ba problema ambiente no lixu.
“Liuhusi atividade ne'e fó hanoin mai ita kona-ba hasae konsiénsia, koñesimentu, kreatividade no Inovativu hodi kontribui valór pozitivu ba ambiente. Tanba ne’e, atividade ne'e hanesan atu loke dalan prosesaun ba problema ambiente no lixu sira.
Agradese ba Plan Internasional no FECT bele apoiu ona no atividade ne'ebé ami halo mak hanesan resiklajen, formasaun ba estudante no komunidade, nune'e sira bele tau importánsia ba ambiente no resiklajen ne'ebé iha", Dehan Vicquiano.
Projetu refere, implementa iha munisípiu tolu hanesan, Ainaro, Aileu no Díli. Suporta husi Plan International no organizasaun Conservation of Environment Timor-Leste no apoiu servisu husi estudante FECT nian.
Partisipa iha lansamentu ne’e mak Estrutura FECT, Diretór Departamentu sira, Diretora Interina Plan International, Sra. Fátima E. Soares, Ekipa husi CETL, Dosente no Estudante sira.
Média UNTL 
: Denilson Amandio Barros
: Denilson Amandio BarrosFoto 
: Denilson Amandio Barros
: Denilson Amandio Barros