Universidade Nacional Timor Lorosa'e (UNTL) nia Centro Nacional de Investigação Científica (CNIC) realiza konferénsia akadémika ho tema "Reflesaun Nacional kona-ba 50.˚ Aniversáriu ba Proklamasaun Independénsia Timor Leste" iha Auditóriu, Faculdade de Ciências Sociais, Caicoli, Díli (9/04)
Magnífiku Reitór Profesór dr. João Soares Martins, MPH,Ph.D, hatete, konferénsia ne'e ho objetivu komemora Loron Proklamasaun Independénsia Timor-Leste, 28 Novembru 1975 ba dala 50, hodi rona direta reflesaun husi Prezidente Repúblika, Dr. José Ramos Horta.
"Objetivu husi konferénsia ida-ne'e, hodi komemora Loron Proklamasaun Independénsia loron 28 fulan Novembru tinan 1975 nian, tanba durante funu, ita-nia fundadór sira, tantu Frente Armada, Kladestina no Diplomátika hamutuk ho Heroi no lider sira luta makaas to'o manan tiha liberdade.
Ohin loron ita sai ona nasaun independente, tanba ne'e ohin ita konvida tan Prezidente Repúblika Dr. José Ramos Horta mai partilla ba ita hotu reflesaun prosesu funu to'o ita konkista no era globalizasaun nian, no ba oin ita sei kontinua konvida lider sira seluk", dehan Reitór.
Iha reflesaun, Oradór, S.E José Manuel Ramos Horta husu estudante sira estuda makaas iha área oioin hodi mellora servisu iha setór oioin iha Timor-Leste, tanba atu valoriza eroi sira-nia dedikasaun mak lisaun lideransa atu dezelvolve nasaun ida-ne'e.
"Mundu ohin loron, situasaun internasional perigozu no grave, liuliu setór ekonomia nian, ita iha problema finanseiru, tanba ita investe ona 40% iha merkadu finanseiru, tanba ne'e estudante sira tenke estuda makaas hodi mellora servisu sira iha Timor-Leste.
Atu valoriza eroi sira-nia dedikasaun mak lisaun nu’udar lideransa mak importante atu dezelvolve nasaun ida-ne'e", dehan Prezidente Horta.
Iha reflesaun ne'e lidera husi eis Reitór, Profresór Dr. Armindo Maia, no organiza husi Centro Nacional de Investigação Científica (CNIC), ne’ebé lidera husi Diretór José António Lourenço.
Partisipa husi Visereitór, Proreitór, Diretór Jerál, Diretór Nacional, Diretór ba Sentru sira, Dekanu, Vise-Dekanu, Xefe Departamentu, Dosente, Funsionáriu, estudante no konvidadu sira.
Média UNTL 
: Leonia de Araújo da Costa
: Leonia de Araújo da CostaFoto 
: Altur Ramos
: Altur Ramos