Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH,Ph.D ho Ministru Ensinu Superior Siénsia no Kultura (MESSK) nian, S.E. José Honório da Costa Pereira Jerónimo hamutuk ho parseiru sira lansa kursu Doutoramentu Interinstituisional iha área Edukasaun Sientífika no Teknolojia.
Iha diskursu Reitór hatete, UNTL marka istória foun, tanba lansa ona kursu doutoramentu interinstituisional área Edukasaun Sientífika no Teknolojia.
"Ohin loron importante tebes hodi marka tan istória ida iha UNTL, tanba ita lansa tan kursu doutoramentu Interinstituisional iha área edukasaun nian.
Hakarak hato'o ami-nia agradesimentu profunda ba apoiu tomak husi Universidade Federal no parseiru sira hotu. Ami espera katak ho kursu ne'e bele aumenta edukadór kualidade barak hodi mellora liután ensinu liuliu nivel edukasaun báziku to'o ensinu superior", dehan Reitór iha Kampus Liceu, Díli (8/04).
Iha fatin hanesan, Ministru MESSK nian, S.E José Honório da Costa Pereira Jerónimo hatete, kursu doutoramentu ne'ebé lansa ne'e, sai hanesan testamuña ida atu eleva kualidade ensinu, investigasaun no inovasaun iha Timor-Leste.
"Ohin momentu importante tebes ba ita nia universidade publika hodi lansa kursu, ida ne'e sai testamuña hodi eleva edukasaun iha ensinu superior nian, no ministériu mós iha kompromisiu katak sei apoiu nafatin formasaun avansada sira hodi kontribui ba dezenvolvimentu sustentável iha país ida-ne'e", dehan Minstru MESSK.
Profesora Maria Fátima Soares nu'udar estudante ba Kursu Doutoramentu ne'e hatete, interesante tebes kontinua iha kursu Doutoramentu ne'e, tanba hakarak eleva koñesimentu iha area edukasaun nian.
"Ha'u hakarak integra an iha kursu doutoramentu ne'e, tanba hakarak eleva hau nia koñesimentu sientífiku iha area edukasaun nian hodi kontribui ba ita-nia fakuldade no universidade", dehan Profesora Maria.
Partisipa iha lansamentu ne'e, Visereitór Proreitór, Diretora Kursu Doutoramentu Interinstituisional nian, Profesora Doutora Patricia Giraldi, Reprezentante Embaixadór Brazil iha Timor Leste, Dr. Humberto Mayese Correa, Dekanu, Visedekanu, Diretór Jerál, Diretór Nasional, Dosente, estudante doutorandu sira no konvidadu balu.
Media UNTL
: Leonia de Araújo da Costa
: Leonia de Araújo da CostaFoto
: Leonia de Araújo da Costa & Domingos Amaral
: Leonia de Araújo da Costa & Domingos Amaral