Universidade Nacional Timor Lorosa’e (UNTL) liuhusi Faculdade de Turizmo Artes Indústrias Creativas Culturais (FTAICC) nia Departamento de Comercio e Turizmo hetan re-avalia husi Agência Nacional Avaliação Acreditação Académica (ANAAA) hodi haree progresu ne'ebé atinje ona iha tinan lima ba kotuk.
Dekanu FTAICC Profesór Feliciano Quintas do Céu sente orgullu, liuhusi prezensa ANAAA nian bele inspira no fó hanoin oinsa bele dezenvolve fakuldade liuliu departamentu ho di’ak.
‘’Ami-nia preparasaun ba kritériu ne’ebé hatur husi ANAAA ne’e ami konsegue responde hotu tanba ami mós responde ba rekomendasaun ne’ebé iha tinan 2018 ANAAA fó ba ami iha avaliasaun dahuluk no dadaun ne’e sei iha tan site visit hodi haree diretamente ba fasilidade sira ne’ebé fakuldade no departamentu iha’’, Dehan Profesór Feliciano iha Sala-Video-Conferência UNTL nian, Díli (27/03).
Iha fatin hanesan, Diretór Ezekutivu ANAAA Sr. Nilton Diamantino Paiva Mau hatete, tinan-tinan ANAAA sempre halo avaliasaun tantu instituisionál no programátika.
“Iha tinan ida-ne’e ANAAA sei halo avaliasaun ba instituisaun rua no programátika ruanulu-resin-rua (22) inklui kursu ida-ne’e rasik, no ohin ne’e halo re-avalia fali, tanba iha tinan lima ba kotuk halo ona avaliasaun.
"Ita-nia objetivu husi re-avalia ne’e atu haree progresu ne’ebé fakuldade ne’e atinje ona, ita sura komesa husi tinan 2018, ita hare ANAAA mai ho standar sanulu Vizaun, Misaun, Kurríkulu, Learning Outcome, Estudante, Dosente, Infrastrutura, Finansas no Planu ba tinan 5 no haree mós ba rekomendasaun ne’ebé iha tinan lima liubá Painel sira husi ANAAA fó hela atu halo mudansa’’, Dehan Diretór ANAAA.
Atividade ne’e realiza entre 27-28 Marsu. Partisipa husi Visereitór para Assunto Académico e Garantia Qualidade Profesor Samuel Venâncio de Souza Freitas, Diretór Nacional Avaliação Qualidade Interna Sr. Agostinho Quelo, Ekipa Avaliadór husi Nasionál no Internasionál, estrutura fakuldade, estudante no alumni sira.
Media UNTL
: Laurindo da Cruz Gomes
: Laurindo da Cruz GomesFoto
: Domingos Amaral
: Domingos Amaral