Universidade Nacional Timor Lorosa’e(UNTL) nia Proreitoria ba Asuntu Provedoria no Akonselhamentu (PRAPA), realiza misa agradesimentu ba Orientasaun Akadémika estudante foun tinan 2025 nian, iha Igreja Imaculada da Conceição, Catedral, Díli (26/03).
Magnífiku Reitór UNTL, Profesór dr. João Soares Martins, MPH,PhD, agradese ba Sívitas Akadémika hotu nia prezensa, UNTL sempre ensera orientasaun no graduasaun ho misa.
“Agradese ba sívitas akadémika hotu nia prezensa, ita sempre realiza misa antes estudante sira aula no graduasaun sempre taka ho misa, ne'e ita-nia tradisaun, tanba sempre hetan grasa husi Maromak iha ita nia kamiñada, tanba ita hakbesik ba Maromak sei iha dalan ba ita-nia moris", dehan Reitór.
Iha omília, Amu selebrante, Padre Frido Abel da Cruz, FdCC, husu estudante sira tenke komprende didi'ak sira nia papel nu’udar estudante.
"Ohin ita hamutuk ho estudante foun sira atu agradese ba Maromak, tanba Nia grasa ba ita, tanba ne'e husu estudante sira tenke ezerse idaidak nia knsar no tenke lori sai matenek ba liur hodi dezeña buat di'ak husi imi-nia an rasik ne'ebé iha folin boot ba sosiedade", dehan Padre Frido.
Partisipa husi Visereitór, Proreitór, Diretór-Jerál, Diretór Nasionál, Xefe Departamentu, Funsionáriu sira, Dosente, Senadu Estudantil, estudante tuan no estudante foun sira.
Media UNTL
: Leonia de Araújo da Costa
: Leonia de Araújo da CostaFoto
: Ekipa Demkom
: Ekipa Demkom