Universidade Nacional Timor Lorosa’e (UNTL) nia Magnífiku Reitór Prof. dr. João Soares Martins MPH prezide Isar Bandeira iha resintu kampus Faculdade de Ekonomia e Gestão (FEG), Díli (10/03) hatete, sívitas akadémika (estudante, funsionáriu no dosente) UNTL nian presiza hatutan nafatin espíritu luta eroi sira-nian.
“Iha semana kotuk Timor-Leste selebra loron veteranu sira-nian, tanba ne’e ita hotu iha obrigasaun agradese ba eroi sira-nia luta ba Libertasaun Nasionál liuliu sira-nia dedikasaun.
Ita-nia eroi no martires da pátria ba sira-nia kontribuisaun ita hato’o respeitu no hato’o agradesimentu wa’in ba sira, tan ne’e mak espíritu tenki hatutan nafatin ba ita hotu iha ne’e no liuliu ba alin estudante sira atu loron-loron tenki esforsu an atu hetan valór di’ak”, hatete Reitór.
Profesór João husu ba sivitas akadémika tomak, hanesan sarani katólika atu halo asaun ida ne’ebé di’ak, tanba dadaun ne’e tama ona ba tempu kuarezma presiza halo jezun.
Korpu isar-bandeira ba fulan Marsu ne’e responsavel husi Faculdade de Economia e Gestão no partisipa husi Visereitór, Proreitór, Diretór Jeral, Diretór Nacional, Xefe Departamentu, Dekanu, Vise-Dekanu, Dosente, Funsionáriu no Estudante sira.
