
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins MPH, Ph.D, hamutuk ho S.E. Ministro Comérsio e Indústria (MCI), Nino Pereira, halo lansamentu ba mákina modernu sanulu resin ida (11) ne'ebé sei distribui ba komunidade iha munisípiu neen hanesan, Baucau, Covalima, Manufahi, Liquiçá, Manatuto no Bobonaro.
Iha serimónia ne'ebé hala'o iha Auditórium FECT-Hera, Díli (27/01), Reitór hateten, servisu ne'ebé UNTL halo liuhusi kooperasaun ho Ministériu Komérsiu no Industria, ne'e hatudu iha área peskiza inovasaun no estensaun servisu, nune'e bele ajuda komunidade iha nível rendimentu ba produtu lokál sira.
"Mákina ne'ebé Faculdade de Engenharia Ciência e Tecnologia (FECT) prodús ne'e hanesan inovasaun ida atu bele haforte liután ita-nia mikro indústria iha rai-laran, no agradese ba fakuldade ba sira-nia matenek no kontribuisaun inovasaun nune'e bele mellora ekonomia nasaun nian, nomós bele habelar siénsia ba komunidade", Tenik Reitór.
Reitór agradese ba MCI ne'ebé tau importánsia ba kooperasaun ne'ebé halo nia rezultadu benefísiu tebes nune'e bele hadiak ekonomia nasaun nian.
Iha fatin hanesan, Ministro Comérsio no Indústria, S.E. Nino Pereira hatete, eventu ne'e importante tebes ba iha dezenvolimentu ekonomia no teknolojia hodi demostra nune'e fó benefísiu ba ita-nia rain, liuliu iha aspetu teknolojia no ekonomia liuhusi matenek no vontade ne'ebé iha.
"Kooperasaun ne'e di'ak tebes entre MCI ho UNTL liuliu FECT ne'ebé hatudu ona rezultadu investimentu iha verifikasaun ekonómiku hodi hatan mós ba programa IX governu, liuliu iha investimentu ekonomia nian, no agradese ba fakuldade ne'ebé prodús ona mákina ho teknolojia aplikavel hodi tulun emprendedorismu kiik ne'ebé presiza", dehan Ministru MCI.
Mákina ne'ebé produs hamutuk sanulu resin ida (11), hanesan Mákina tein tua sabu (7) Mákina loke nuu kulit (2), Mákina pres nuu (1) no Mákina hamaran produtu lokál (1), no projetu ne'e realiza, tanba servisu hamutuk entre FECT-DEM ho Ministériu Komersiu no Indústria no traballadõr sira mai husi estudante Enjeñaria Mekánika no apoiu tékniku husi Alumni no Dosente sira.
Média
: Denilson Amandio Barros

Foto
: Agostinho da Cruz
