
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH,Ph.D ho estrutura simu vizita husi Parlamentu Nacional nia Komisaun G iha Sala-Videokonferénsia UNTL nian, Díli, (9/1), hodi rekolla informasaun, liuliu ezekusaun orsamentu no dezafiu sira.
Iha entrevista Reitór hatete, Komisaun G vizita UNTL hodi rekolla informasaun liuliu ezekusaun orsamentu ba 2024 nian no jestaun rekursu umanu liuliu dosente sira ne’ebé ho idade reforma maibé kontinua hanorin, no dezafiu sira ne’ebé UNTL hasoru.
“Ohin UNTL hetan vizita husi Komisaun G hodi rekolla informasaun liuliu ezekusaun orsamentu ba tinan 2024 nomós jestaun rekursu umanu, liuliu dosente sira ne’ebé tama ona ba idade reforma nian, tanba ne’e presiza prepara atu bele kontratu fali joven sira”, dehan Reitór.
Entretantu Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu Armando dos Santos Lopes hatete, Komisaun G vizita UNTL hodi rekolla informasaun klean kona-ba ezekusaun no jestaun rekursu umanu, liuliu UNTL iha Fakuldade sanulu maibé dosente la sufisiente, prosesu sira-ne’e la'o ona iha Funsaun Publika, maibé atinji de’it 21 dosente, no UNTL presiza dosente 50, tanba ne’e Komisaun G tenta hela atu rezolve.
“Ohin ami mai vizita UNTL hodi rekolla informasaun liuliu preokupasaun ami nian, relasional ho ezekusaun orsamentu no jestaun rekursu umanu, liuliu dosente ne’ebé la sufisiente tanba UNTL iha fakuldade sanulu maibé sira atinji de’it 21 maibé ita presiza to’o 50, prosesu sira-ne’e to’o ona iha Komisaun Funsaun Públika no ami kontinua tenta atu rezolve”, dehan Prezidente Komisaun G.

Partisipa iha vizita ne’e, Visereitór, Proreitór, Diretór Nacional, membru Komisaun G no asistente tékniku sira.
Média
: Leonia de Araújo da Costa

Foto
: Leonia de Araújo da Costa
