
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D prezidi Isár Bandeira iha fulan Janeiru 2025 ne’ebé realiza iha Kampus Sentral, Díli (06/01), aleinde ne’e hodi hahú atividade administrasaun no akadémika iha tinan foun.
Iha diskursu Reitór hatete, tinan ne’e UNTL sei selebra ezisténsia UNTL ba dala 25 nune’e Reitór husu ba sentru no fakuldade sira organiza semináriu no seluk tan hodi komemora aniversáriu refere.
“Tama 2025 ita iha eventu bo’ot tebes espesialmente ba UNTL nomós ba Timor-Leste tama ona ba bodas de prata, nu’udar momentu selebrasaun ezisténsia UNTL nian ba dala 25, nune’e husu ba Fakuldade no Sentru sira bele organiza semináriu sira.
Semináriu bo’ot tolu mak sei realiza ho nível internasionál, hanesan konferénsia konjuntu ho Universidade Undana Kupang, semináriu husi TLSA (Timor-Leste Study Asosiation), no Timor-Leste sai uma na’in ba FORGES (Fórum de Gestão do Ensino Superior nos Países e Regiões de Língua Portuguesa)”, hatete Reitór.
Reitór mós husu nafatin ba sívitas akadémika sira, iha momentu isár bandeira nian atu utiliza nafatin tais tanba, tais mós parte ida identidade Timor-Leste nian.

Partisipa iha serimónia ne’e, Visereiór, Proreitór, Diretór Jeral, Diretór Nasionál, Xefe Departamentu, Funsionáriu no seluk tan. Enkuantu Korpu-Isar Bandeira no Koru responsabiliza husi Diresaun Jerál Servisu Aministrasaun Akadémika no Diresaun Administrasaun Jerál UNTL.
#TimorLeste #UNTL 6 Janeiru 2025
Média
: Agostinho da Cruz

Foto
: Domingos Amaral
