Universidade Nacional Timor Lorosa’e (UNTL) liuhusi Prezidente Konsellu Jerál, Padre Acâcio Domingos de Castro hamutuk ho membro sira, realiza toma de pose ba Magnífiku Reitór eleitu Profesór Dr. Joviano António da Costa ho estrutura foun ba mandatu períodu tinan 2026-2031, iha Auditoriu Faculdade de Engenharia Ciência e Tecnologia (FECT) Hera, Díli (30/01).
Prezidente Konsellu Jerál UNTL nian, Padre Acácio Domingos de Castro hatete, profisaun akadémiku la’ós de’it atu hanorin, maibé simu mós responsabilidade.
“Ita tenke rekoñese katak sei iha buat barak mak tenke hadia, Konsellu Jerál fó fiar tomak ba Dr. Joviano hodi tau no tula iha ita boot nia kabas leten, konfiansa ida-ne’e la mamuk. Tanba haree ba ita boot nia kontribuisaun no prova ona kapasidade atu lidera husi ambiente kiik, maibé ho nia impaktu boot, espera ita sei haree nia mudansa iha futuru”, dehan Prezidente Konsellu Jerál.
Iha fatin hanesan, Vise-Primeiru-Ministru, Ministru Koordenadór ba Asuntu Social, no Ministru ba Dezenvolvimentu Rural no Abitasaun Komunitáriu, Eng. Mariano Asanami Sabino hatete, UNTL la’os atu forma ema sai matenek no profesional de’it, maibé atu kontinua mós luta ba rekursu umanu ida kualidade, tanba Timor atu sai koñesidu iha mundu internasional liuhusi determinasaun Universidade nian.
“UNTL nu’udar instituisaun istóriku ida ne’ebé mai husi Politeknik Hera no UNTIM, tanba ne’e ita kontinua forma rekursu atu sai lutador la’os de’it profesional no matenek. Maibé atu kontinua luta ba UNTL ninia dezenvolvimentu, tanba Timor-Leste atu sai koñesidu iha mundu internasional liuhusi universidade sira, tanba ne’e IX governu sei fó apoiu tomak ba funsionamentu sira hotu iha UNTL”, dehan Eng. Asanami.
Iha diskursu Magnífiku Reitór, Profesór Dr. Joviano António da Costa, hatete, progresu Timor Leste nian depende ba medida boot husi kualidade ensinu, investigasaun no inovasaun ne’ebé promove iha universidade.
“Agradese ba parte hotu ne’ebé apoiu, nune’e ohin bele to’o iha faze ida-ne’e. Ita presiza mellora no fortalese instituisaun, no mellora programa akadémiku, atividade estrakurikular sira no seluk tan, hodi kontribui ba dezenvolvimentu instituisaun nian, liuliu edukasaun iha ensinu superior”, dehan Reitór Joviano.
Magnífiku Reitór Profesór Dr. Joviano António da Costa simu-pose husi Ministru Ensinu Superior Siénsia no Kultura (MESSK) Profesor José Honório da Costa Jerónimo, akompaña husi Padre Clemente Moreira FDCC, no Komisaria Komisaun Funsaun Públika, Sra. Anita Tavares Ribeiro de Jesus.
Partisipa husi Ministra Edukasaun S.E. Dulce de Jesus Soares, Ministru Planeamento no Investimentu Estratéjiku Eng. Gastão Francisco de Sousa, Sekretariu Estadu Terras no Propriedades, Eng. Jaime Xavier Lopes, Embaixador sira iha Timor-Leste, Eis Reitór sira, estrutura foun, estrutura reitoria sesante, dekanu, diretór jerál, diretór nasionál, dosente, estudante, no konvidadu sira.
#TimorLeste #UNTL #VisePM #MESSK #ME #MPIE #ConselhoGeral 30 Janeiru 2026
Média UNTL 📝 : Leonia de Araújo Da Costa
Foto 📷 : Altur Ramos