
Universidade Nacional Timor Lorosa’e (UNTL) nia Profesór Dr. Nuno Da Silva Gomes aprezenta nia Oratio Sapientia ho tema “Siénsia La’ós Atu Hanorin De’it Krítika Maibé Tulun Hodi Kontribui Ba Dezenvolvimentu Nacional” iha serimónia graduasaun iha loron daruak sesaun loraik nian, període daruak iha tinan 2024 nian ba dala XXXI, iha CCD, Díli (20/12).
Profesór Dr. Nuno da Silva Gomes hatete, UNTL fó ona edukasaun no formasaun, nune’e sai ona ajente kualifikadu ba dezenvolvimentu hodi kombina siénsia no teknolojia, tanba siénsia la’ós hanorin de’it krítika, maibé tulun atu kontribui ba dezenvolvimentu nasional.
“Graduasaun ba tinan 2024 nian, ohin UNTL nia Faculdade Educação Artes e Humanidade no Faculdade Filosofia e Ciência Humana marka tan istória ida, tanba ne’e siénsia ne’ebé imi hetan la’ós de’it hanorin krítika, maibé tulun hodi kontribui ba dezenvolvimentu nasional, tanba sosiedade presiza imi nia prezensa”, dehan Oradór.
Oradór ne’e mós salienta, graduadu sira hetan ona edukasaun iha nivél akadémiku, tanba ne’e edukasaun la’os atu hetan de’it grau, maibé keta haluha implementa karakter moral no kona-ba komprimísiu iha moris tomak nian atu aprende serbí no kontribui ba povu nia moris di’ak.
“Papel graduadu sira nian iha dezenvolvimentu ne’e importante no estratéjiku iha Nasaun nian, graduadu sira mak sai ajente ba mudansa ne’ebé bele fó kontribuisaun ba setór oioin”, Tenik Dr. Nuno.
Partisipa iha serimónia solene ne'e, Magnífiku Reitór Profesór dr. João Soares Martins, MPH, Ph.D, Visereitór, Proreitór, Diretór Jerál, Diretór Nasionál, Diretór Sentru sira, Dekanu, Visedekanu, Diretór Departamentu, Dosente, funsionáriu, inan-aman, estudante no konvidadu sira.
Média
: Leonia de Araújo da Costa

Foto
: Ekipa DEMCOM & Estudante DCS
