Universidade Nacional Timor Lorosa'e (UNTL) nia Faculdade de Economia e Gestão (FEG) atribui títulu akadémiku ba finalista hamutuk atus rua ruanulu resin tolu (223) liuhusi Judisium ne’ebé realiza iha Salaun Oka Hudi Laran, Díli (27-11).
Iha diskursu Dekanu FEG, Profesór Filipe Mendes Perreira, agradese ba Maromak ba grasa sabedoria nian no agradese mós ba profesór sira-nia servisu no dedikasaun hodi guia estudante sira durante prosesu estudu nian.
"Parabéns ba finalista sira ba susesu ne’ebé konkista husu atu kontinua nafatin estudu ba nivel mestradu nian no aproveita esplora koñesimentu iha mundu dizitalizasaun, nune'e hodi bele hariku liutan koñesimentu", Dehan Dekanu.
Iha sorin seluk reprezentante Magnífiku Reitór no atual Vise-Reitor para os Assuntos da Administração, Finanças e Administrador Geral Profesór Dr. Hélio A.X. Mauquei, agradese ba fakuldade liuliu ba korpu dosente sira.
“Agradese ba korpu-dosente ne’ebé mak eduka no forma estudante sira durante prosesu estudu nian, no agradese mós ba inan-aman sira-nia konfiansa ba UNTL hodi eduka no forma oan sira iha área Siánsia Ekonomia, Jestaun no Kontabilidade.
Husu ba finalista sira buka atu aprende nafatin no kontribui matenek ne’ebé iha ba nasaun nia dezenvolvimentu liuhusi koñesimentu kriativu, kooperativu no kolabarativu", Dehan Profesór Hélio.
Iha fatin hanesan, Ministro Ensino Superior Ciência e Cultura (MESCC) S.E José Honório da Costa Pereira Jerónimo hato'o parabéns ba finalista sira nomós ba Inan-Aman sira ne’ebé oferese sira-nia oan hodi hala'o prosesu estudu iha FEG.
"Imi finaliza ona estudu, maibé buka atu kursu nafatin hodi haklean koñesimentu, tanba evolusaun mundu no siénsia lao ba oin la’ós ba fali kotuk", Dehan Ministru.
Total finalista husi Faculdadede de Economia e Gestão hamutuk (223) Husi Departamentu tolu: Deparatamento de Ciência Economia (78) Departamento de Gestão (63) no Contabilidade (82).
Judisium FEG 2024 ne’e hala’o ho tema "Inovasaun iha Sosiedade 5.0 liuhusi 4c, Critical Ideal, Creative, Cooperative no Colaborative ba Economia Sustentável".
Judisium ne'e partisipa husi Dekanu, Visedekanu, Diretor Jeral, Diretor Nacional, reprezentante Banco Central Timor- Leste (BCTL) Dra. Sara Lobo Brites, Inan-Aman, Estudante no Konvidadu sira.
Média UNTL 
: Mario Jonio Mendonça
: Mario Jonio MendonçaFoto
: Altur Ramos
: Altur Ramos