Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH,Ph.D asina MoU ho Dekana Faculdade de Direito (FADIR) husi Universitas Gadjah Mada, iha Sala-Videokonferénsia UNTL nian, Díli, (7/11) hodi koopera iha área Direitu nian.
Relasiona ho MoU refere, Dekanu FADIR UNTL nian, Profesór José Tomás Alves hatete, asina memorandu ne'e oportunidade di'ak, tanba parte rua bele halo estudu komparativu ba mai, no fó mós bolsa ba estudante.
"Agradese ba UGM nia FADIR, tanba mai ona iha UNTL no asina akordu ho ita, no kooperasaun ida-ne'e sei haree liuba Faculdade de Direito iha UNTL, no FADIR-UGM mós hakarak fó oportunidade ba estudante sira bele halo estudu komparativu no fó bolsa ba timoroan sira bele estuda diferensia juridiku iha Indonesia ho Timor-Leste", dehan Dekanu.
Entretantu Dekana FADIR-UGM nian, Profesora Dahliana Hasan hatete, objetivu husi memorandu ne'e atu koopera iha área direitu UNTL, no iha programa hanesan, Edukasional, Peskiza no Kultura nian.
"Objetivu husi asina akordu ne'e, ami hakarak mai koopera ho UNTL nia FADIR, tanba ami hakarak estudante sira iha UNTL bele koñese FADIR UGM no ami mós sei fó bolsa ba sira bele ba kontinua mestradu hodi estuda diferensia juridika iha Timor-Leste no Indonesia, espera estudante sira bele iha vontade atu ba estuda iha FADIR-UGM", dehan Dekana Dahliana.
Akompaña iha asina akordu ne'e Visedekana ba Asuntu Estudantil FADIR nian, Profesora Prycilia Antónia D. Ximenes, asistente tékniku no ekipa husi FADIR-IGM nian.
Media
: Leonia de Araújo da Costa
: Leonia de Araújo da CostaFoto
: Mario Jonio Mendonça & Denilson A. Barros
: Mario Jonio Mendonça & Denilson A. Barros