Universidade Nacional Timor Lorosa’e (UNTL) nia Faculdade de Agricultura ho Ministériu Agricultura, Pecuaria, Pesca no Floresta (MAPF) no Australian Centre for International Agricultural Research (ACIAR) lansa Projetu To’os Servisu Kma’an (TOSKA) iha Salaun Enkontru City 8, Manleuana, Díli (07/11).
Dekanu FAGRI-UNTL Prof. Dr. Vicente de Paulo Correia hatete, UNTL servisu hamutuk ho Charles Darwin University husi Australia, projetu ne’e atu kapasita agrikultór sira kona-ba produsaun.
“Projetu TOSKA ne’e servisu hamutuk ho Charles Darwin University (CDU), maibé implementa liuhusi programa ACIAR, ne’ebé sei foka liuba kapasitasaun, formasaun ba agrikultór sira no seluk tan. Iha projetu ne’e sei inklui dosente na’in tolu husi Faculdade de Agricultura husi Departamento de Ciência de Solo, Agronomía no Agro-Socio Economia no kada tinan finalista na’in 14 husi FAGRI nian sei hakerek teze liga ba projetu ne’ebé mensiona durante projetu ne’e hala’o”, hatete Dekanu.
Iha fatin hanesan Lideransa Projetu ACIAR nian Dr. Leigh hatete, projetu refere sei implementa husi UNTL, Don Bosco, TOSKA, no MAPPF atu kapasita agrikultór sira liga ba ai han ho nutrisaun barak liután.
“Ohin loron ami halo lansamentu projetu ne’ebé sei implementa husi UNTL liuhusi Faculdade de Agricultura, TOSKA, Don Bosco no Ministériu Agrikultura. Fundus mai husi ACIAR liuhusi Governu Australia ho komisaun husi CDU.
Projetu ida-ne’e produtividade servisu, tanba forsa traballu servisu agrikultór menus nune’e projetu ida-ne’e bele apoiu agrikultór sira atu produs barak liután ho hahan ne’ebé nutrisaun nakonu”, hatete Dr. Leigh.
Fatin ne’ebé sei implementa projetu ne’e mak iha koloka ba iha Aldeia ne’en husi munisípiu tolu hanesan, Ainaro, Manufahi, Baucau.
Partisipa iha lansamentu ne’e Representante MAPPF Sr. Luis de Almeida ho nia funsionáriu sira, Dosente husi Faculdade de Agricultura UNTL, delegasaun husi Charles Darwin Australia.
Media UNTL 
: Agostinho da Cruz
: Agostinho da CruzFoto
: Domingos Amaral
: Domingos Amaral