Universidade Nacional Timor Lorosa’e (UNTL) nia estudante Domingos O. S. Anuno sai vensedór iha kompetisaun dezeñu Maskote, kompetisaun ne’e organiza husi Gabinete Visereitora ba Asuntu Estudantís (GVRAE) nia Departamentu Atividade Estrakurikulár.
Visereitora ba Asuntu Estudantís Profesora Lígia Tomás Coreia agradese ba ekipa juri sira-nia disponibilidade, kompetitór (partisipante) no komisaun sira-nia.
“Atividade kompetisaun ne’e realiza atu fó biban ba estudante sira hodi espresa kreatividade liuhusi dezeñu maskote, ha’u mós husu ba manan na’in sira atu bele kolabora hamutuk hodi halo dezeñu maskote ida ba selebrasaun Dies Natalis UNTL nian ba-dala 24 nian. Nune’e hanesan parte ida estudante promove sira-nia obra kreatividade no ideia ne’e mak bele esplora hodi representa UNTL’’, dehan Visereitora iha Gabinete Pós-Graduação FEG nian, Díli (25/10).
Vensedór Domingos O. S. Anuno nu’udar estudante Departamento de Medicina Geral-FMCS nian hatete, la espera bele sai hanesan manan-na’in, tanba kompetisaun ne’e ba nia atu bele espresa talentu hodi kontribui ba universidade liuhusi dezeñu no hanoin ne’ebé nia iha.
“Ha’u mós hasoru dezafiu barak, tanba laiha esperiénsia di’ak iha parte dezeñu maskote ne’e, maibé liuhusi kompetisaun ida ne’e fó opurtunidade ba ha’u atu halo dezeñu no aprende hodi mellora tan ha’u-nia kapasidade iha dezeñu ne’e.
Ha’u husu ba estudante sira hotu ne’ebé iha UNTL atu labele subar ita-nia talentu no kreatividade sira ne’ebé mak bele fó benefísiu ba ita no bele kontribui ba UNTL’’, dehan Domingos.
Vensedór ba iha kompetisaun ne’e mak I lugar Domingos O. S. Anuno husi FMCS ho valór 262, II lugar Francelino Soares Babo husi FTAICC ho valór 235, III lugar Carolin de Angel B. Abilio husi FAGRI ho valór 229.
Partisipa iha atividade ne’e Visereitór ba Asuntu Pós-Graduasaun no Peskiza Profesór Afonso de Almeida, Prezidente Komisaun Organizadora ho ekipa, ekipa Juri no estudante sira.Média UNTL 
: Laurindo da Cruz Gomes
: Laurindo da Cruz GomesFoto 
: Eugenia de Jesus Guterres
: Eugenia de Jesus Guterres