Universidade Nacional Timor Lorosa'e (UNTL), nia Faculdade de Turismo Arte Creativas é Culturais (FTAICC) sai vensedór iha kompetisaun Debate Sientífiku entre estudante sira husi kada fakuldade, iha ámbitu ba komemorasaun Dies Natalis UNTL nian, iha 17 Novembru (2000-2024), kompetisaun ne'e organiza husi Gabinete Visereitora ba Asuntu Estudantís (GVRAE), iha resintu Kampus Sentral UNTL nian, Díli (18/10).
Iha diskursu Visereitora ba Asuntu Estudantís Dra. Lígia Tomás Correia hatete, debate sientífiku ne'e ho foku ba asuntu sosiál, sientífiku, ambientál.
“Agradese ba ita hotu ne'ebé mak partisipa iha atividade ida ne'e, debate sientífiku ne’e sai kustume ida atu konkista estudante sira, katak imi-nia kompeténsia no koñesimentu ba área sientífiku, área Teknolojia, Arte no Kultura, Ambiental, imi to’o iha faze ida ne'ebé ona, nune'e hodi prepara hela fini di'ak ba instituisaun sira ne'ebé mak karik presiza imi”, dehan nia.
Prezidenti Juri Mica Barreto Soares nu’udar dosente husi Departamentu Relasaun Internasional hateten, eventu ne'e di’ak tebes, liuliu atu dezenvolve abilidade estudante sira-nian, hodi iha hanoin ne’ebé krítiku kona-ba problema sosiál, polítika, ekonomia iha rai-laran.
“Durante loron rua ne’e (17-18 Outobru) ha'u haree katak, estudante sira barak mak domina no hatene halo debate, argumentu ne'ebé sira hamosu di'ak tebes, ita bele haree katak, fini di'ak ba futuru dezenvolvimentu rai ida-ne’e nian”, dehan Prezidente Juri Barreto.
Estudante debatór Abel de Araújo husi FTAICC nian hatete, kompetisaun ne’e atu estimula estudante nia pensamentu krítiku no analítiku, bele esplora koñesimentu no mentalidade individual, ne’ebé ko’alia espertu no lójika kona-ba fenomenu atual.
“Atu garantia estudante nu'udar ajente transformadora sosiál tenke hahú liuhusi prosesu estudu nian no atividade estrakurrikular hirak ne'e hodi promove pensamentu krítiku no reforsa kultura debate akadémiku iha UNTL. Liuhusi inisiativa sira-ne'e enkoraja dezenvolvimentu inteletuál no prepara estudante atu kontribui ho ativu ba sosiedade”, dehan Abel.
Kompetisaun Debate sientífiku ne'e kompostu husi Faculdade de Agricultura (FAGRI), Faculdade Engenharia Ciência e Tecnologia (FECT), Faculdade de Educação Arte e Humanidades (FEAH), Faculdade de Economia e Gestão (FEG) Faculdade de Filosofia Ciências Humanas, Faculdade de Ciências Sociais (FCS), Faculdade de Ciências Exata (FCE).
Rezultadu indika katak, primeiru lugar okupa husi Faculdade de Turismo Arte Indústria Creativas Culturais (FTAICC), segundu lugar husi Faculdade de Direito (FADIR), terseiru luga husi Faculdade de Medicina e Ciência da Saúde (FMCS).
Média UNTL 
: Altur Ramos
: Altur RamosFoto 
: Altur Ramos
: Altur Ramos