Universidade Nacional Timor Lorosa’e (UNTL) nia Xefe Departamentu Atividade Estrakurrikulár (DAE) Sr. Joviano Salves Reis iha Kampus Sentrál UNTL nian, Díli (22/10) hatete, atividade Joven Talentu nu’udar atividade hodi hasa’e no mellora estudante sira-nia koñesimentu no abilidade.
‘’Tinan ida-ne’e (2024) ami realiza atividade estrakurrikulár ba estudante sira iha Programa Joven Talentu kompostu husi modalidade ualu mak hanesan : Debate Sientífiku, Eskrita Sientífika, Diskursu Públiku, Video Kreativu, Dezeñu Gráfiku, Sadres, Dezeñu Maskot ba estudante sira iha fakuldade sanulu iha UNTL hodi promove sira-nia talentu’’, dehan Sr. Joviano.
Nia mós hatutan, estudante sira ne’ebé hetan klasifikasaun di’ak iha atividade sira-ne’e sei hetan prémiu iha loron Dies Natalis UNTL nian iha 17 Novembru 2024.
‘’Estudante sira ne’ebé mak hetan ona klasifikasaun di’ak iha atividade kompetisaun sira-ne’e sei simu prémiu no sertifikadu apresiasaun iha Dies Natalis UNTL nian.
Ami mós sei fó apresiasaun ba estudante sira ne’ebé hodi UNTL nia naran partisipa iha kompetisaun husi Instituisaun seluk organiza”, dehan.
Média UNTL 
: Laurindo da Cruz Gomes
: Laurindo da Cruz GomesFoto 
: Eugenia de Jesus Guterres
: Eugenia de Jesus Guterres