Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, hamutuk ho estrutura no Sívitas Akadémika presta omenajen ikus ba maktoban Profesór Mateus Ximenes M.Si, iha Kampus Faculdade de Economia e Gestão (FEG), Díli (16/10).
Reitór UNTL hateten lori sívitas akadémika universidade nia naran, hato’o sentidu kondolénsia ba familia enlutada liuliu ba maktoban Profesór Mateus ne’ebé durante ne’e dedika nia an ba universidade liuliu FEG.
“UNTL sente triste, tanba lakon mestre ida ne’ebé dedika nia an ba universidade, assumi kargu nu’udar Diretór Departamento de Gestão, nune’e mós sai hanesan Fundadór ba Departamentu Kontabilidade no sai mós Diretór Departamento de Contabilidade.
Profesór Mateus asumi knaar ida ne’ebé naruk tebes hatudu katak nia dedikasaun ba UNTL ne’e boot tebes, hahú estabelese sistema kursu Jestaun no kursu Kontabilidade no husi nia rezultadu produz graduadu barak ne’ebé oras ne’e balun servi ona nasaun Timor-Leste”, dehan Reitór.
Reitór konvida sívitas akadémika UNTL nian atu halo orasaun ba Profesór Mateus, liuliu ba matebian nia kaben no oan sira atu forsa nafatin, nune’e Maromak bele haraik perdaun no fó fatin di’ak ba matebian nia klamar iha reinu Lalehan.
Maktoban Profesór Mateus Ximenes moris iha loron 2 Jullu 1971, kursu lisensiatura iha Universitas STIE Kertanegara Malang- Indonesia iha tinan 2001, Kontabilidade area Finansas, kursu masteradu iha Universitas Sebelas Maret iha Surakarta-Indonesia iha tinan 2013 iha kontabilidade finanseira.
Assumi kna’ar nu’udar profesór permanente iha FEG UNTL iha tinan 2005. Assumi kargu nu’udar Diretór Departamento de Gestão iha tinan 2007-2010 durante tinan 3. Assumi mós kargu nu’udar Diretór Departamento de Contabilidade iha tinan 2015-2023 durante tinan 8. Matebian hakotu nia peregrinasaun iha Hospital Nacional Guido Valdares iha loron 15 Outobru 2024 ho idade 53.
Média UNTL 
: Roberta da Cruz (estajiária)
: Roberta da Cruz (estajiária)Foto 
: Mario J. Mendonça
: Mario J. Mendonça