Universidade Nacional Timor Lorosa’e (UNTL) nia estudante Pio Jackelly de Jesus sai vensedór ba kompetisaun diskursu públiku ho tema ‘’Papél Média iha Luta Libertasaun Patria no Libertasaun Povu” organiza husi Gabinete Visereitoria ba Assuntu Estudantís (GVRAE) nia Departamentu Atividade Estrakurikulár, iha Auditóriu FCS, Kaikoli, Díli (10-10).
Reprezentante Visereitora ba Asuntu Estudantis no atuál Visedekanu Asuntu Estudantís Faculdade de Educacão Artes e Humanidades Profesór David Aleixo Guterres hatete, aprezentasaun ne’e kona-ba temátiku diskursu nian no idaidak nia maneira atu apresenta no atu sira bele aumenta tan sira-nia kapasidade.
“Iha kompetisaun ita sempre iha manan no lakon ne’e duni sira ne’ebé sai manan na’in, parabéns ba imi no sira ne’ebé seidauk manan, tanba seidauk to’o imi-nia sorti, maibé hakaas aan nafatin hodi bele atinje imi-nia mehi sira no kontinua nafatin promove imi-nia talentu sira ba oin”, dehan Profesór David.
Pio Jackelly de Jesus nu’udar estudante Departamento Engenharia Informática, FECT nian dehan, liuhusi kompetisaun ne’e bele promove estudante sira iha Diskursu Públiku, no aprende nafatin hodi melhora tan iha futuru.
“Ha’u sente kontente tebes, tanba bele sai hanesan manan na’in ba iha kompetisaun ida-ne’e, tanba ne’e foin dahuluk ha’u partisipa no bele sai manan na’in hodi reprezenta Fakuldade FECT nian”, dehan Pio.
Kompetisaun ne’e organiza husi Gabinete Visereitoria ba Asuntu estudantís nia Departamentu atividade Estrakurikulár, partisipa husi estudante husi fakuldade sira iha UNTL.
Manan na’in ba iha kompetisaun ne’e mak I lugar Pio Jackelly de Jesus husi FECT ho valór 262 no II Lugar Anita C. Gama husi Faculdade de Agricultura (FAGRI) ho valór 255, III Lugar Yuliana B. Lalek husi Faculdade de Ciências Sociais (FCS) ho valór 247.
Média UNTL 
: Roberta da Cruz (estajiária)
: Roberta da Cruz (estajiária)Foto 
: Laurindo da Cruz Gomes
: Laurindo da Cruz Gomes